د طالبانو ځايي چارواکو له ځینو کورنیو رسنیو سره په خبرو کې تایید کړې ده چې پاکستان نن سهار وختي (دوشنبه، د وږي ۳۰مه) د کنړ او پکتیکا ولایتونو پر ځینو سیمو هوايي بریدونه کړي دي.
په کنړ کې د طالبانو د اطلاعاتو او کلتور رییس نجیبالله حنیف طلوعنیوز ته ویلي چې د پاکستان پوځ د سهار شاوخوا ۳:۰۰ بجې د دغه ولایت د نورګل ولسوالۍ په یوه سیمه کې هوايي برید کړی دی.
هغه زیاته کړې چې په دې برید کې یو کور په نښه شوی، چې له امله یې درې کسان وژل شوي او څو نور ټپیان شوي دي.
دغه رسنۍ د ځايي سرچینو له قوله لیکلي چې د سهار شاوخوا ۴:۰۰ بجې په پکتیکا ولایت کې هم هوايي برید شوی دی.
د سرچینو په وینا، د پکتیکا ولایت د برمل ولسوالۍ په «رخه» او «تورکندي» سیمو کې یو تش کور او یو دوکان په نښه شوي دي.
تر اوسه له دغو دوو هوايي بریدونو څخه د مرګژوبلې راپور نه دی ورکړل شوی.
د پاکستان حکومت تر اوسه په دې اړه په رسمي ډول څه نه دي ویلي.
دا په داسې حال کې ده چې تېره شپه د طالبانو او پاکستاني ځواکونو ترمنځ د سرحدي نښتو راپورونه خپاره شوي وو.
د پکتیا ولایت د ځاځي اریوب ولسوالۍ ځايي سرچینو ویلي وو چې طالبان او پاکستاني پوځیان د ډیورنډ کرښې په اوږدو کې د «سپینې شګې» په سیمه کې له یو بل سره ښکېل شوي دي.
