د بالیووډ سینما پر لوبغاړي ټایګر شروف تېره شپه (یکشنبه، د تلې ۲۶مه) د هند په ممبۍ ښار کې وسلهوال برید شوی او د لارنس بشنوي ډلې د دغه برید مسوولیت منلی دی.
د «ټایمز اف انډیا» خبري اژانس د راپور له مخې، برید د ماښام شاوخوا اووه بجې د «جوهو» په سیمه کې هغه مهال شوی چې ټایګر شروف د زوکړې ورځې له یوې مېلمستیا څخه د وتلو په حال کې و.
د دغه رسنۍ د راپور له مخې، درېیو ناپېژاندو موټرسایکلسورو بریدګرو د ټایګر شروف پر موټر اووه ډزې کړې دي. د ډزو له امله د هغه موټرچلوونکی او یو مینهوال په مرمیو ټپیان شوي او خپله شروف د ماتې شوې ښیښې د ټوټو له امله سطحي ټپونه برداشته کړي دي.
بریدګر تر ډزو وروسته له سیمې تښتېدلي او د هند پولیسو او استخباراتي ادارو په دې اړه څېړنې پیل کړې دي.
پولیس د ټولنیزو رسنیو هغه ادعا هم څېړي چې پکې انیل پاندیت او هرمن ساندو نومي کسانو ځانونه د لارنس بشنوي ډلې غړي معرفي کړي او د برید مسوولیت یې منلی دی.
دغو دوو کسانو ادعا کړې چې شروف د بالیووډ د مشهور لوبغاړي سلمان خان سره د اړیکو یا همکارۍ له امله په نښه شوی دی. په دغه پیغام کې د ممبۍ د سینما د صنعت نورو هغو کسانو ته هم ګواښ شوی چې له سلمان خان سره یې همکاري کړې ده.
د انیل پاندیت او لارنس بشنوي ډلې ترمنځ د اړیکو په اړه اوازې خپرې شوې دي، خو پولیسو تر اوسه دا ادعا نه ده تایید کړې.
پاندیت ته په منسوب پیغام کې راغلي: «ژر یا ناوخته، د ټولو وار به راورسي.»
انیل پاندیت تر دې مخکې هم په ډیلي کې د هندي سندرغاړي ګورو راندهاوا د ورزشي کلب مخې ته د ډزو مسوولیت منلی و.
د روان کال په جولای کې د هند د سینما لوبغاړی عامر خان هم له ګوري سپرات سره د واده له امله د هغو کسانو له لوري ګواښل شوی و چې له لارنس بشنوي ډلې سره تړاو لري.
۶۶ کلن بابا ضیاالدین صدیقي، د مهاراشترا ایالت پخوانی وزیر، د لوېدیځ باندره له حوزې څخه د ایالتي قانون جوړونې شورا درېځلي استازی او د ملتپال کانګرس ګوند مشر، د ۲۰۲۴ کال په اکتوبر کې ووژل شو. دغه وژنه هم لارنس بشنوي ډلې ته منسوبه شوې وه او د هغې احتمالي انګېزه له سلمان خان سره د صدیقي نږدې اړیکې بلل شوې وې.
همدارنګه، د ۲۰۲۴ کال په اپرېل کې دوو موټرسایکلسورو بریدګرو، ویکي ګوپتا او ساګر پال، د ممبۍ ښار د باندره په سیمه کې د «ګلکسي اپارتمانز» په نوم ودانیز کمپلکس کې د سلمان خان د استوګنځي مخې ته ډزې وکړې.
څېړونکو ادعا کړې وه چې دغه برید د لارنس بشنوي او د هغه د ورور انمول په امر ترسره شوی و. د دوی په وینا، دا برید په ۱۹۹۸ کال کې د سلمان خان له لوري د هوسۍ د ناقانونه ښکار له قضیې څخه د دوی د ناخوښۍ له امله شوی و.
لارنس بشنوي د یوې جنایي ډلې مشر دی چې له ۲۰۱۵ کال راهیسې په زندان کې دی؛ خو د راپورونو له مخې، هغه دومره نفوذ او وفادار کسان لري چې د زندان دننه هم د مشهورو څېرو پر ضد خپل عملیات اداره کوي.
