د فرانسې ولسمشر امانوېل مکرون په یوه نااعلان شوي سفر سعودي عربستان ته تللی او د دغه هېواد له ولیعهد محمد بن سلمان سره یې لیدلي او خبرې کړې دي.
د فرانسې د ولسمشرۍ ماڼۍ نن (چهارشنبه، د میزان ۲۹مه) اعلان کړی چې دغه سفر د سعودي عربستان له پاچاهۍ سره د فرانسې د پیوستون څرګندونه کوي، ځکه چې دغه هېواد د حوثیانو له بریدونو سره مخ دی.
مکرون لومړنی لوېدیځ مشر دی چې پر سعودي عربستان د حوثیانو د بریدونو له زیاتېدو وروسته دغه هېواد ته سفر کوي او له ولیعهد سره یې لیدنه کړې ده.
د فرانسې خبري اژانس د یوه خبریال په حواله لیکلي چې مکرون له بن سلمان سره د لیدنې په ځای کې شاوخوا درې ساعته تېر کړي دي.
د دغه رسنۍ د راپور له مخې، د الیزه ماڼۍ ویلي چې مکرون او بن سلمان هوکړه کړې چې سعودي عربستان به فرانسې ته «د اړتیا تر هرې مودې پورې» اضافي ډیزل ولېږي.
د الیزه ماڼۍ زیاته کړې چې دواړو لورو هوکړه کړې چې د امنیتي همکاریو د پراخولو او د هرمز تنګي د بدیلې لارې په موخه د زیربنايي پروژو په اړه هم مشورې وکړي.
سعودي عربستان ته د مکرون سفر د خلیج هېوادونو ته د هغه د سفر یوه برخه ده. نوموړی په دې سفر کې د نفتو د صادراتو او د تېلو د بیو د راټیټولو په اړه خبرې کوي؛ دا موضوع په فرانسه کې د تېرې اوونۍ د پای د تاوتریخجنو لاریونونو له لاملونو څخه هم بلل شوې ده.
مکرون تر دې مخکې اعلان کړی و چې فرانسې د حوثیانو د بریدونو پر وړاندې د سعودي عربستان په ینبع ښار کې د نفتو د ترمینل د ساتنې لپاره خپل ځواکونه استولي دي. خو هغه په ورته وخت کې د سعودي عربستان او حوثیانو ترمنځ د خبرو اترو پر بیا پیل ټینګار کړی و.
