د «مکې دفاعي تړون» د غړو هېوادونو، سعودي عربستان، ترکیې او پاکستان لوړپوړي چارواکي ټاکل شوې نن (دوشنبه، د لړم ۴مه) په تهران کې له ایراني چارواکو سره وګوري او د سیمهییزې همغږۍ په اړه خبرې وکړي.
رویټرز خبري اژانس د دوو باخبره سرچینو له قوله راپور ورکړی چې د سعودي عربستان د دفاع وزیر شهزاده خالد بن سلمان، د پاکستان د پوځ لوی درستیز عاصم منیر او د ترکیې د استخباراتو ادارې مشر ابراهیم کالین به په دې غونډه کې ګډون وکړي.
د رویټرز د راپور له مخې، دا پلان شوې خبرې به د یمن د حوثیانو له خوا پر سعودي عربستان د بریدونو له زیاتېدو راهیسې د ایران او د مکې دفاعي تړون د درې واړو غړو هېوادونو د لوړپوړو چارواکو ترمنځ لومړنۍ اړیکه وي.
د ایران د ملي امنیت عالي شورا د منشي مرستیال علي باقري له صداوسیما خبري اژانس سره په خبرو کې تهران ته د مکې ائتلاف د درې واړو غړو هېوادونو د چارواکو سفر تایید کړی دی.
ایران د حوثیانو په پوځي ملاتړ تورن دی. د سیمې هېوادونو او امریکا څو ځله له ایران څخه غوښتي چې د حوثیانو له ملاتړ لاس واخلي. خو ایراني چارواکي وايي چې حوثیان په خپلواکه توګه فعالیت کوي او که دواړه لوري هوکړې ته ورسېږي، تهران چمتو دی چې د حوثیانو او سعودي عربستان ترمنځ منځګړیتوب وکړي.
ترکیې، پاکستان او سعودي عربستان د روان میلادي کال په اګست کې د مکې دفاعي تړون لاسلیک کړ. د دې تړون له مخې، پر هر یوه غړي د وسلهوال برید په صورت کې، دغه برید پر ټولو غړو شوی برید ګڼل کېږي.
د مکې تړون د غړو هېوادونو وزیران د روانې میاشتې په پیل کې په ریاض کې په یوه بېړنۍ غونډه کې راټول شول او هوکړه یې وکړه چې سعودي عربستان ته د ځواکونو او پوځي امکاناتو د چټک استولو زمینه برابره کړي.
د ترکیې په پارلمان کې د دې تړون د ارزونې او تصویب بهیر تېره اوونۍ پیل شوی او لا هم دوام لري. پاکستان هم تېره اوونۍ دغه تړون تصویب کړ.
پاکستاني چارواکو څو ځله د دې تړون د فعالېدو او سعودي عربستان ته د ځواکونو د استولو خبر ورکړی، خو تر اوسه ترکي او پاکستاني ځواکونه په ښکاره توګه له حوثیانو سره نه دي ښکېل شوي.
