طالبلر جاري ییلده ایکّینچی بار دایکندی ولایتی‌نینگ مرکزی نیلی شهریده «امیرگه اطاعت»نی ترغیب قیلیش مقصدیده کتابخوانلیک تنلاوینی اۉتکزماقده.
طالبلر نشر قیلگن چقیریققه کۉره، اوشبو کتابخوانلیک تنلاوی دایکندی ولایتیده‌گی طالبلرنینگ اخبارات و مدنیت اداره‌یی، تخنیکي و کسبي تعلیم باشقرمه‌سی همده «منار علمي و مدني نشریات باشقرمه‌سی» تامانیدن ۱۲-میزان سنه‌سیده اۉتکزیله‌دی.
طالبلرنینگ «مرکزي فتوا دارالافتا»سی تامانیدن یازیلگن «شریعت تیزیمینی مستحکملشده اطاعت نینگ تأثیری» ناملی کتاب تنلاو اوچون اۉقیله‌دیگن منبع صفتیده تنیشتیریلگن.
اوشبو چقیریقده یاشلر، اۉقووچیلر، طلبه‌لر و طالبلر اعضالریدن کتابنی اۉقیب، کتابخوانلیک تنلاویده اشتراک اېتیش سۉره‌لگن.
طالبلرنینگ تنلاوده اشتراک اېتیشگه چقیریغی
تخمیناً ۳۰ صحیفه‌لیک اوشبو کتاب نینگ مضمونی تۉلیق «سۉزسیز اطاعت» نینگ واجبلیگی و امیرنینگ بویروغیگه بۉیسونمسلیک نینگ تعقیقلنگنیگه قره‌تیلگن.
دایکندیلیک بیر منبع «اطلاعات روز» گزیته‌سیگه ایتیشیچه، طالبلر انستیتوتلر باشلیغیلریگه محصللری اوشبو تنلاوده اشتراک اېتیشی کېره‌کلیگی حقیده بویروق بېرگن.
کتابده طالبان رهبری «امیر» یاکه «امیرالمومنین» صفتیده تنیشتیریلگن و امیرگه اطاعت قیلیش خلق نینگ «دیني وظیفه‌سی» اېکنی تأکیدلنگن.
طالبلر اوشبو کتابده «امیرنینگ بویروق و تعقیقلریگه قرشی چیقیش جایز اېمس» همده «امیرنینگ بویروغی قرشیسیده شخصلر‌نینگ خواهش-ایستکلری هېچ قنده‌ی اهمیتگه اېگه اېمس»، دېب تأکیدله‌گن.
طالبلرنینگ دارلافتا اداره‌سی اوشبو کتابده آدملر «الله‌نینگ راضیلیگی اوچون» امیرگه اطاعت قیلیشی کېره‌کلیگی، بیراق بیعت قیلگنیدن کېین اوندن قَیتیش حقوقیگه اېگه اېمسلیگینی بیلدیرگن. چونکه بو گروه نظریده امیرگه بېریلگن بیعتنی بوزیش «ناجایز» حسابلنه‌دی.
طالبلر اوشبو کتاب آرقه‌لی اونینگ مضمونیده‌گی غایه‌لرنی کتابخوانلیک تنلاولری واسطه‌سیده ترغیب قیلیشگه اورینیب، امیر یاکه اۉز رهبریگه اطاعت قیلیشنی خلق اوچون «واجب» دېب اته‌گن.
کتاب‌نینگ بیر قِسمیده «بویروق‌نینگ فایده‌سینی بیلمه‌گن تقدیرده هم امیرگه اطاعت قیلیش واجب اېکنی و مجاهدلر بویروقلرنینگ سببلرینی امامدن سۉره‌ی آلمه‌سلیگی» توشونتیریلگن.
طالبلر جاري ییل‌نینگ فبروری آییده هم دایکندیده امیرگه اطاعتنی ترغیب قیلیش مقصدیده کتابخوانلیک تنلاوینی اۉتکزگن و اشتراکچیلر اوچون اۉقیله‌دیگن منبع صفتیده عیناً شو کتابنی تنیشتیرگن. بیراق بو کتاب دایکندی بیلن چېکلنمه‌یدی. حاضرگچه باشقه اَیریم ولایتلرده، جمله‌دن غور و پروانده هم شو اساسده تنلاولر اۉتکزیلگن.
سۉنگگی ایکّی ییل دوامیده طالبان «اماره‌تشناسلیک» ناملی، عبدالستّار سعید تامانیدن یازیلگن و سید نور محمد محبوبي کورابي تامانیدن فارس تیلیگه ترجمه قیلینگن باشقه بیر کتابنی هم اۉز غایه‌لرینی ترغیب قیلیش منبعسی صفتیده تنیشتیریب، مملکت بۉیلب کتابخوانلیک تنلاولرینی اۉتکزگن.
سۉنگگی ایکّی ییل دوامیده تورلی ولایتلرده‌گی بیلیم یورتلردن منبعلر عامه‌وي اخبارات واسطه‌لریگه طالبلر محصللرنی «اماره‌تشناسلیک» کتابینی اۉقیش و امتحان تاپشیریش اوچون تشکیل اېتیلگن کتابخوانلیک تنلاویده قتنه‌شیشگه مجبور قیلگنینی بیلدیرگن اېدی.
