منبعلر و طالبلرنینگ محلي مسووللری خوستده بیر وکیل مدافع و جوزجان ولایتیده بیر اېرکک نینگ اۉلدیریلگنی حقیده خبر بېردی.
خوستده‌گی محلي منبعلرنینگ ایتیشیچه، نامعلوم قوراللنگن شخصلر بوگون (سه‌شنبه، ۷ میزان) اېرته‌لب «اسماعیل‌خیل و مندۉزی» اولسواللیگی‌ده «مفتی هدایت‌الله» اسملی وکیل مدافع‌نی قورال بیلن آتیب اۉلدیرگن.
منبعلرگه کۉره، هدایت‌الله اسماعیل‌خیل و مندۉزی اولسواللیگی‌نینگ اصلی اهالیسی بۉلگن و «حقوقی همده فیقه مسأله‌لرده چوقور بیلیمگه» اېگه‌لیگی بیلن تنیلگن.
حاضرچه بو وکیل مدافع‌نینگ اۉلدیریلیش سببی معلوم اېمس. خوستده‌گی طالبلرنینگ محلي مسووللری هم بو باره‌ده ایضاح بېرمه‌گن.
شو بیلن بیرگه، طالبلرنینگ جوزجان ولایتی امنیه قوماندانلیگی اوشبو ولایت‌نینگ خانقا اولسواللیگیده‌گی «شاه میرزا» قیشلاغیده بیر اېرکک اۉلدیریلگنی حقیده خبر بېردی.
طالبلرنینگ جوزجان ولایتی امنیه قوماندانلیگی مطبوعات سوزلاوچیسی عبدالستّار حلیمي‌نینگ ایتیشیچه، بو اېرکک کېچه تونده اۉز اوییده تۉپّانچه‌دن فایده‌لنیب اۉلدیریلگن.
اونینگ قۉشیمچه قیلیشیچه، ایرکک‌نینگ خاتینی اونینگ اۉلدیریلیشیگه علاقه‌دارلیکده گمانلنیب، طالبلر کوچلری تامانیدن حبسگه آلینگن و قاتللیک سببی یوزه‌سیدن تېرگاو دوام اېتماقده.
طالبلر افغانستان اوستیدن نظارتنی قۉلگه آلگنیدن بېری مملکت‌نینگ تورلی ولایتلریده آدملرنینگ اۉلدیریلیشی حالتلری سېزیلرلی درجه‌ده کۉپه‌یگن.
کۉپلب حاللرده بو قاتللیکلرنینگ آرتیده «نامعلوم قوراللنگن شخصلر» تورگنی ایتیله‌دی، بیراق طالبلر اولرنینگ انیقلنگنی و جزالنگنی حقیده کمدن-کم حاللرده خبر بېره‌دی.
