بریتانیا پولیسی‌نینگ تروریزمگه قرشی کوره‌ش بۉلیمی «داعش»نی ترغیب قیلگن، بوندن اوّل اېسه «هیئت تحریر الشام» ترغیباتچیسی بۉلگن یاش ییگیت اوچ یریم ییلگه قماق جزاسیگه حکم قیلینگنینی معلوم قیلدی.
بریتانیا پولیسی بیاناتیده ایتیلیشیچه، بو شخص «لقمان احمد» بۉلیب، انگلستان نینگ شِمالی-غربیده جایلشگن منچستر شهریده یشه‌یدی.
۲۵ یاشلی لقمان احمد دوشنبه کونی (۵میزان) منچستر قیراللیک سودیده «تروریزمنی رغبتلنتیریش» عیبلاوی بۉییچه عیبدار دېب تاپیلیب، اوچ یریم ییل قماق و بیر ییل قۉشیمچه نظارت جزاسیگه حکم قیلینگن.
پولیس بیاناتیده او آزادلیککه چیققنیدن کېین اۉن ییل دوامیده «آغیر جنایتلرنینگ آلدینی آلیش تۉغریسیده‌گی بویروق» عمل قیلیشی ایتیلگن.
بریتانیا پولیسی‌نینگ معلوم قیلیشیچه، لقمان احمد دستلب ۲۰۱ه-ییلده، اتیگی ۱۶ یاشیده، «هیئت تحریر الشام» ترغیباتچیسی بۉلگن. «هیئت تحریر الشام» اۉشه پیتده «القاعده» بیلن علاقه‌دار بۉلگن و حاضرگی سوريه‌‌نینگ مؤقت جمهور رییسی احمد شرع باشچیلیگیده فعالیت یوریتگن.
لقمان احمد حبسگه آلینگنیدن سۉنگ انستاگرام وتسپ آرقه‌لی «جهاد»نی قۉللب-قوّتلاوچی اۉقوو ویدیولرینی ترقه‌تیشده عیبلنگن و ایکّی ییل جماعت خدمتلریگه جلب اېتیش جزاسیگه حکم قیلینگن.
بیراق احمد دستلبکی حکمدن کېین، جزاسی بېلگیلنه‌یاتگن پیتده، «داعش» گروهینی قۉللب-قوّتلاوچی آنلاین مواد ترقه‌تیشنی باشله‌گن.
بریتانیا پولیسی‌نینگ تروریزمگه قرشی کوره‌ش بۉلیمی‌نینگ معلوم قیلیشیچه، لقمان احمد ۲۰۲۳ییل ۱۰-اکتوبرده حبسگه آلینگن و اونینگ حکمی ایکّی ییل اۉتیب چیقریلگن.
