افغانستان برق ییتکزیش (برشنا) تاجیکستان برق شرکتی افغانستانگه صادری قیله‌یاتگن برق انرژیسی حجمینی آشیریشگه راضی بۉلگنینی معلوم قیلدی.
طالبلر نظارتی آستیده‌گی برشنا شرکتی بوگون (چهارشنبه، ۸ میزان) ترقه‌تگن بیاناتیده ایتیشیچه، بو کېلیشوو برشنا باشلیغی عبدالحق همکار و «تاجیک‌برق» شرکتی باشلیغی محمد عمر اسوزاده اۉرته‌سیده تاجیکستانده بۉلیب اۉتگن اوچره‌شوو چاغیده عملگه آشیریلگن.
بیاناتده ایتیلیشیچه، تامانلر تاجیکستاندن افغانستانگه صادر قیلینه‌دیگن برق انرژیسی حجمینی آشیریش، الکتر اوزه‌تیش لینيه‌لرینی مستحکملش و رواجلنتیریش، الکتر انرژیسی نینگ صفتی و کوچلنیشینی یخشیلش، تعرفه‌لر، اینوېستیتسيه امکانیتلری، تخنیکي ترې‌نینگلر همده اوزاق مدتلی همکارلیکنی کېنگه‌یتیریش کبی مسأله‌لرنی محاکمه قیلگن.
بیاناتگه کۉره، اوچره‌شووده برشنا مسووللری تاجیکستان‌نینگ افغانستانگه اېکسپورت قیله‌یاتگن الکتر انرژیسی حجمینی آشیریشنی سۉره‌گن و تاجیکستان هیئاتی بو باره‌ده تیار اېکنینی بیلدیرگن.
تاجیکستان برق شرکتی مسووللری و برشنا هیئاتی ۵۰ح کیلوالتلی برق اوزه‌تیش لینيه‌سی مسأله‌سینی هم محاکمه قیلگن. شونینگدېک، برشنا و تاجیکستان برق شرکتی نینگ تخنیکي همده تجاري گروهلری کېلیشیلگن مسأله‌لرنی عملگه آشیریش اوستیده ایشلشی بېلگیلنگن.
افغانستان تورکمنستان، اۉزبېکستان، تاجیکستان و ایراندن برق انرژیسی صادر قیله‌دی. بو دولتلر آره‌سیده تاجیکستان افغانستانگه قریب ۳۰۰ مېگاوات برق انرژیسی اېکسپورت قیله‌دی. جمهوریت باشقرووی دوریده ۵۰۰ کیلوالتلی برق اوزه‌تیش لینيه‌سینی قوریش رېجه‌لشتیریلگن اېدی، بیراق حاضرگچه اونینگ عملي قوریلیش ایشلری باشلنمه‌گن.
