طالبلرنینگ هرات ولایتی امنیت قوماندانلیگی اسلام‌قلعه باجخانه‌سیده یانغین صادر بۉلگنینی تصدیقلب، واقعه جاییگه اۉت اۉچیریش کوچلری یوباریلگنینی معلوم قیلدی.
طالبلرنینگ هراتده‌گی امنیه قوماندانلیگی مطبوعات سوزلاوچیسی مسعود حسینی‌نینگ ایتیشیچه، یانغیننی اۉچیریش حرکتلری دوام اېتماقده.
او یانغین‌نینگ قنده‌ی صادر بۉلگنی حقیده تفصیلات بېرمه‌گن.
شو بیلن بیرگه، طالبلرنینگ هرات ولایتی والیسی اداره‌سی اسلام‌قلعه چېگره‌سیده بیر نېچته موتر آره‌سیده یانغین چیققنی و تېزکار چاره‌لر کۉریلیشی نتیجه‌سیده یانغین نظارتگه آلینگنینی معلوم قیلدی.
مذکور اداره حاضرگچه انسانلر آره‌سیده قربانلر حقیده معلومات کېلیب توشمه‌گنینی، مادّي ضرر مقداری و یانغین سببی اۉرگنیله‌یاتگنینی بیلدیردی.
بیر ساعت اوّل اسلام‌قلعه باجخانه‌سیده یانغین صادر بۉلگنی حقیده خبر بېریلگن اېدی. خبرلرگه کۉره، بیر نېچته نفت و گاز تشووچی تانکرلر پارتله‌گن.
حاضرچه اوشبو واقعه حقیده مستقل منبعلردن انیق معلوماتلر موجود اېمس.
اسلام قلعه افغانستان‌نینگ ایران بیلن چېگره‌سیده‌گی مهم باجخانه‌لریدن بیریدیر. اوشبو چېگره پونکتی جمهوریت دوریده هم کتّه یانغینگه اوچره‌گن و کتّه مقدارده ضرر کۉرگن اېدی.
