طالبلرنینگ هرات ولایتیده‌گی محلي مسووللری گذره اولسواللیگیده اوچ اکه-اوکه قودوق ایچیده بۉغیلیش و آکسجن یېتیشمسلیگی عاقبتیده هلاک بۉلگنینی اَیتماقده.
بو واقعه تیناوون (چهارشنبه، ۸ـ میزان) گذره اولسواللیگی گی‌نینگ «نیشین» منطه‌سیده صادر بۉلگن.
طالبلرنینگ هرات ولایتیده‌گی فوق العاده حادثه‌لرگه قرشی کوره‌شگه تیارگرلیک اداره‌سی باشلیغی «قاری حذیفه»نینگ ایتیشیچه، اوچ اکه-اوکه دهقانچیلیک بیلن شغللنه‌یاتگن پیتده سوو آلیش اوچون قودوققه توشگن و اوچه‌له‌سی هم آکسجن یېتیشمسلیگی همده بۉغیلیش عاقبتیده حیاتدن کۉز یومگن.
اونینگ ایتیشیچه، قودوق نینگ چوقورلیگی تخمیناً ۸ـ ۱۰متر بۉلگن.
محلي منبعلر ایتیشیچه، دستلب اوچ اکه-اوکه‌دن بیری آکسجن یېتیشمسلیگی سببلی قودوق ایچیده قالیب کېتگن. ایکّی اوکه‌سی اونی قوتقریش اوچون قودوققه توشگن و آخر-عاقبت اوچه‌له‌سی هم هلاک بۉلگن.
منبعلرگه کۉره، اوچ اېرکک‌نینگ جسدی تیناوون یریم تونده قودوقدن چیقریب آلینگن.
شونگه اۉخشش حادثه‌لر اوّل هم صادر بۉلگن. قودوققه توشیش وقتیده احتیاطسیزلیک قیلیش و خوفسیزلیک واسطه‌لری‌نینگ موجود اېمسلیگی بونده‌ی حادثه‌لرنینگ سببلریدن بیری صفتیده کۉرسه‌تیله‌دی.
