پاکستان اوردوسی مطبوعات سوزلاوچیسی احمد شریف چودری مطبوعات انجمنی چاغیده طالبلرنینگ ایکینچیلیک و چارواچیلیک وزیری عطاالله عمرینی «تروریزم‌نینگ ما مشروع فرزندی» دېب اته‌دی.
چودری بوگون (پنج‌شنبه، ۹-مېزان) اۉتکزگن مطبوعات انجمنیده طالبلر ایکینچیلیک و چارواچیلیک وزیری‌نینگ سرطان آییده هندستان‌گه قیلگن سفریدن ویدیونی نمایش اېتدی. طالبلرنینگ ایکینچیلیک و چارواچیلیک وزیری اوشبو ویدیوده اۉزینی «بېگانه» یورتده حس قیلمه‌یاتگنینی ایتیب، هندستانلیک بیر منصبدارگه اشاره قیلگن حالده: «سیز ایتگنینگیزدېک، بیزنینگ دی‌‌ان‌‌ای‌میزخیل»، دېیدی.
پاکستان اوردوسی مطبوعات سوزلاوچیسی اوشبو سۉزلرگه اشاره قیلیب، شونده‌ی دېدی: «بو بیزنینگ غربي چېگره‌لریمیزده جایلشگن اۉشه تروریزم‌نینگ تا مشروع فرزندیدیر.»
او ینه شونده‌ی دېدی: «بو افلاس ایشنی (ترورچیلیک هجوملرینی) بیر نېچه تنگه، دالر و پول عوضیگه بونی عملگه آشیریشگه تیار بۉلگن کیشیگه تاپشیریشدن کۉره قنده‌ی یخشی امکانیت بۉلیشی ممکن؟»
احمدشریف چودری، شونینگدېک، «افغانستان بیرلشگن جبهه‌سی» رهبری و مملکت سابق حکومتی‌نینگ اوردو قوماندانلریدن بیری سمیع سادات‌نینگ صحبتیدن اَیریم قِسملرنی نمایش اېتدی. سمیع سادات اونده: «طالبان هندستان بیلن جوده یقین علاقه‌لرگه اېگه، هندستاندن پول آله‌دی و بو پوللرنی تی‌تی‌پی همده بلوچلرگه بېره‌دی، اولر اېسه پاکستان‌ده عملیاتلر اۉتکزه‌دی»، دېیدی.
پاکستان اوردوسی مطبوعات سوزلاوچیسی، شونینگدېک، افغانستان سابق حکومتی‌نینگ ایچکی ایشلر وزیری مسعود اندرابي‌نینگ ویدیوسینی هم نمایش اېتدی. اونده اندرابي: «هندستان طالباننی قۉللب-قوّتله‌یدی، تاکه اولر آرقه‌لی تی‌تی‌پی‌گه تأثیر اۉتکزیش و پاکستان‌گه قرشی کوره‌شیش ممکن بۉلسین»، دېیدی.
پاکستان دایما هندستان پاکستان طالبان حرکتی (تی‌تی‌پی) و «بلوچستان آزادلیک اوردوسی»نی قۉللب-قوّتله‌یاتگنی همده بو گروهلر افغانستان توپراغیدن فایده‌لنیب، پاکستان‌ده هجوملر اویوشتیره‌یاتگنینی دعوا قیلیب کېله‌دی. طالبلر و هندستان اېسه پاکستان‌نینگ بو دعوالرینی دایما رد اېتیب کېلگن.
پاکستان اوردوسی اوشبو بیاناتلرنی بوگون تانگده ینه بیر بار افغانستان‌نینگ کنر و هلمند ولایتلریده‌گی نشانلرنی بامباردمان قیلگن بیر پیتده اعلان قیلدی.
بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) اوشبو هجوملرده کمیده ۱۰ نفر تینچ اهالی، اولرنینگ اکثریتی باله‌لر، هلاک بۉلگنینی و ینه ۹ کیشی تینچ اهالی یره‌لنگنینی تصدیقله‌دی.
بو پاکستان‌نینگ سۉنگگی ایکّی هفته ایچیده افغانستان‌گه اویوشتیرگن اوچینچی هجومی بۉلدی. پاکستان رسميلری تی‌تی‌پی و «بلوچستان آزادلیک اوردوسی» یشیرینگن جایلر نشانگه آلینگنینی دعوا قیلماقده، بیراق طالبلر تینچ اهالی‌نینگ اویلریگه هجوم قیلینگنینی اَیتماقده.
