طالبلرنینگ قندهارده‌گی واليسی ملا شیرین اداره‌سی اونینگ «القاعده» ترماغی، پاکستان طالبان حرکتی (تی‌تی‌پی) و بلوچستان آزادلیک اوردوسی وکیللری بیلن اوچره‌شگنی حقیده‌گی ادعالرنی رد اېتدی.
طالبلر والیسی اداره‌سی بوگون (جمعه، ۱۰-میزان) ایکی اجتماعي ترماغیده نشر قیلگن بیاناتیده پاکستان اوردوسی مطبوعات سوزلاوچیسی احمد شریف چودری نینگ ادعاسینی رد اېتگن.
طالبلر والیسی اداره‌سی شونده‌ی دېدی: «پاکستان اوردوسی مطبوعات سوزلاوچیسی‌نینگ قندهارده اوشبو ولایت والیسی باشچیلیگیده خارجي جنگریلر اشتراکیده ییغیلیش اۉتکزیلگنی حقیده‌گی ادعاسینی رد اېته‌میز.»
طالبلر والیسی اداره‌سی اوشبو گروه‌نینگ «خارجي جنگریلرنی تکلیف قیلیش یاکه اولر بیلن اوچره‌شوو اۉتکزیشگه هېچ قنده‌ی احتیاجی یۉق»لیگینی بیلدیردی.
چودری کېچه مطبوعات انجمنیده طالبلرنینگ قندهارده‌گی والیسی ملا شیرین جاري ییل نینگ ۲۶-اگوستیده «القاعده» وکیللری، بلوچ عصیانچیلری یېتکچیسی بشیر زېب و تی‌تی‌پی نینگ بۉلینمه‌لریدن بیری رهبری حافظ گُل بهادیر بیلن اوچره‌شگنینی ایتگن اېدی.
اونینگ قۉشیمچه قیلیشیچه، طالبلر اوشبو گروهلر بیلن پاکستان حکومتیگه قرشی عملیاتلرده همکارلیک قیلیش و اۉز کوچلرینی بیرلشتیریش بۉییچه کېلیشیب آلگن.
اسلام‌آباد پاکستان طالبان حرکتی و بلوچستان آزادلیک اوردوسینی «فتنه الخوارج» و «فتنه هندستان» دېب اته‌یدی. پاکستان بو قوراللی گروهلر هندستاندن مالیوي و حربي یاردم آله‌یاتگنینی، افغانستان حدودیده موجود بۉلیب، او یېرده اۉقوو مرکزلری و یشیرین باش‌پناه‌لرگه اېگه اېکنینی همده افغانستان طالبانی بیلن موافقلشتیریلگن حالده پاکستان خلقی و حکومتیگه قرشی «ترورچیلیک هجوملری»نی عملگه آشیره‌یاتگنینی ایته‌دی.
بیراق افغانستان طالبانی و هندستان حکومتی پاکستان‌ده‌گی اوشبو قوراللی گروهلرگه علاقه‌دارلیگی یاکه اولرنی قۉللب-قوّتله‌یاتگنینی دایما رد اېتیب کېلگن.
پاکستان اوردوسی طالبلر افغانستانده حاکمیتگه کېلگنیدن و تی‌تی‌پی همده هجوملری کوچه‌یگنیدن سۉنگ، افغانستان حدودیده، اینیقسه چېگره‌الدی حدودلرده، اۉنلب مرته هوا هجوملرینی عملگه آشیرگن. پاکستان بو هجوملرده «ترورچیلر» نشانگه آلینگنینی ایته‌دی، بیراق طالبان تینچ اهالی بامباردمان قیلینه‌یاتگنینی بیلدیره‌دی. اَیریم حالتلرده، جمله‌دن هلمند، کنر و پکتيا ولایتلریده، بیرلشگن ملتلر تشکیلاتی تینچ اهالی‌نینگ هلاک بۉلگنینی تصدیقله‌گن.
