بیرلشگن عرب امیرلیکلری باش قره‌لاوچیسی حمد سیف الشامسی فلای دبی اوچاقیده‌گی حادثه بۉییچه اۉتکزیلگن تېرگاو یاردمچی اوچووچی ترورچیلیک حرکتینی عملگه آشیریشگه اورینگنینی کۉرسه‌تگنینی ایتدی.
بیرلشگن عرب امیرلیگی اخبارات آژانسی‌نینگ خبریگه کۉره، الشامسي یاردمچی اوچووچی پرواز وقتیده کابین‌ده «فوق العاده بالته»دن فایده‌لنیب، کپتان اوچووچیگه هجوم قیلگنی و اوچاق باشقرووینی قۉلگه آلیشگه اورینگنینی ایتگن.
فوق العاده بالته عادتده فوق العاده وضعیتلرده فایده‌لنیش اوچون اوچووچیلر کابینیده سه‌قلنه‌دی.
بیرلشگن عرب امیرلیگی باش قره‌لاوچیسی حادثه‌نینگ برچه تفصیلاتلری، سببلری و اونگه علاقه‌دار بۉلیشی ممکن بۉلگن هر قنده‌ی باغلیقلیکلرنی انیقلش اوچون تېرگاو دوام اېته‌یاتگنینی بیلدیرگن.
اونینگ ایتیشیچه، تخنیکي تېکشیروولر همده جسماني و رقملی دلیللرنی تحلیل قیلیش ایشلری هم آلیب باریلماقده.
فلای دبی شرکتی‌نینگFZ1073 رېیسی چهارشنبه کونی دبی‌دن ایسرایلگه یۉل آلگن. اوچاقده معما یوزه‌گه کېلگنی و اوچووچیلر اۉرته‌سیده ماجرا صادر بۉلگنی حقیده خبر بېریلگه‌چ، اوچاق سعوديه عربستانیگه قۉنگن.
ایتیلیشیچه، یاردمچی اوچووچی اساسي اوچووچیگه هجوم قیلیب، اونی یره‌له‌گن.
رسميلر نینگ بیلدیریشیچه، یاردمچی اوچووچی نینگ حرکتلری عاقبتیده ۱۸۲ نفر یۉلاوچی و اېکیپاژ اعضاسی بۉلگن اوچاق هلاکت یاقه‌سیگه کېلگن، چونکه او اوچاقنی کېسکین شۉنغایشگه آلیب کېلگن.
اسرایل رسميلری‌نینگ ایتیشیچه، عمان فقراسی اېکنی تخمین قیلینه‌یاتگن یاردمچی اوچووچی اوچاقنی قوله‌تیشنی رېجه‌لشتیرگن. بیراق یره‌لنگن اوچووچی‌نینگ اۉز وقتیده کۉرگن چاره‌سی و کابینه اېشیگی‌نینگ آچیلیشی نتیجه‌سیده باشقه اېکیپاژ اعضالری همده یۉلاوچیلر یاردمچی اوچووچینی جلولب، اوچاقنی قوله‌شدن سه‌قلب قالگن.
بو مسأله‌دن خبردار بیر شخص‌نینگ ایتیشیچه، عمان حکومتی یاردمچی اوچووچی‌نینگ تروریستی قره‌شلرگه مایللیگی بارلیگیدن خواطرلنگنی سببلی اونی پروازلردن چېتله‌تگن.
تېرگاو دوام اېته‌یاتگنی سببلی اسمینی آشکار قیلیشنی ایسته‌مه‌گن اوشبو شخص‌نینگ ایتیشیچه، شوندن سۉنگ بیرلشگن عرب امیرلیکلریده جایلشگن فلا دبی شرکتی اونی ایشگه آلگن.
حاضرچه شرکت اونی ایشگه قبول قیلیش جریانیده اونینگ ترجمه‌ی حالی و ملَکه‌سینی قَی درجه‌ده تېکشیرگنیگه انیقلیک کیریتیلمه‌گن. «وال‌استریت ژورنال» گزیته‌سی عمان اونی پروازلردن چېتله‌تگنی حقیده بیرینچی بۉلیب خبر بېرگن اېدی.
تېرگاو جریانیدن خبردار بیر منصبدارنینگ ایتیشیچه، یاردمچی اوچووچی بیرلشگن عرب امیرلیکلریده توغیلگن، اونینگ آنه‌سی اېسه سوريه‌لیک.
