خیبر پختونخوا باش وزیری سهیل آفریدی پاکستان تحریک انصاف حزبی‌نینگ نمایشی اېرته‌گه (۴ـ اکتوبر) لکی مروت‌ده‌گی گندی چارراهه‌‌سیدن باشلنیشینی و حاکمیت همده قانون اوستوارلیگی تأمینلنیب، مستقل قضایه حاکمیتی قَیته تیکلنگونگه قدَر دوام اېتیشینی ایتدی.
خیبر پختونخوا باش وزیری ایکس‌ده‌گی پُستیده پاکستان دیموکرا‌تیک دولت اېکنینی و مملکت اساسی قانون تینچ یۉل بیلن ناراضیلیک بیلدیریش حقوقینی کفالتلشینی تأکیدله‌دی.
اونینگ ایتیشیچه، تحریک انصاف حزبی‌نینگ برچه طلبلری اساسی قانون و مملکت قانونلریگه موافقدیر.
او شونده‌ی یازگن: «۴٫-اکتوبر کونی آدملر دېنگیزدېک گندی چارراهه‌دن، لکی مروتدن حرکتینی باشله‌یدی و پاکستان‌ده اساسی قانون همده قانون اوستوارلیگی تأمینلنیب، مستقل محکمه حاکمیتی قَیته تیکلنگونگه قدَر کوره‌شینی دوام اېتتیره‌دی».
مذکور نمایش اوّل ۵-میزان کونی اۉتکزیلیشی رېجه‌لشتیریلگن اېدی. بیراق قطار سببلرگه، جمله‌دن، کوچلی خوفسیزلیک چېکلاولری، اسلام‌آبادگه آلیب بارووچی برچه یۉللرنینگ کانتېنرلر بیلن یاپیلیشی و خوفسیزلیک کوچلری‌نینگ جایلشتیریلیشی سببلی کېچیکتیریلگن.
تحریک انصاف حزبی طرفدارلری بوندن آلدین هم بیر نېچه بار نمایش اۉتکزیب، حزبی یېتکچیسی عمران‌خان‌نینگ قماقدن آزاد قیلینیشینی طلب قیلگن.
خیبېر پختونخوا باش وزیری پاکستاننی «مجبوري» طرزده نظارتیگه آلگنلر مملکت‌نینگ پرچه‌لنیشینی ایسته‌یاتگنینی ایتیب، اولرنی حاکمیتنی سه‌قلب قالیش اوچون «پاکستاننی آلاوگه تشله‌ماقده»، دېیه عیبله‌دی.
او، شونینگدېک، «رژیم اۉزگرگنیدن» سۉنگ تروریزم اته‌یلب ینه خیبر-پختونخواگه یوکله‌تیلگنینی دعوا قیلدی. اونینگ ایتیشیچه، تحریک انصاف حزبی ۲۰۲۲-ییل یازیده بو مسأله‌ده اۉز آوازینی کۉترگنیده، اونی یالغانچی دېب اتشگن.
او شونده‌ی دېدی: «تروریزم خیبر-پختونخوا و پاکستان خلقی اوچون نارراتیولر اوروشی اېمس؛ هر بیر فقرا بوندن ضرر کۉرگن».
خیبر پختونخوا باش وزیری تحریک انصاف حزبی اساسچیسی عمران‌خان مملکت ایچیده‌گی اهالیگه قرشی حربي عملیاتلر اۉتکزیش و اولرنی اۉز اوی-جایلرینی ترک اېتیشگه مجبور قیلیش بو معما نینگ برقرار یېچیمی اېمسلیگینی دایما تأکیدلب کېلگنینی ایتدی.
اونینگ ایتیشیچه، اوچووچیسیز اوچاقلر هجوملری و «یانداش ضرر» دېب اتله‌دیگن حالتلر تروریزم‌نینگ کوچه‌ییشیگه سبب بۉلگن.
