روسيه‌‌نینگ کابلده‌گی اېلچیخانه‌سی پاکستان‌نینگ کنر و هلمند ولایتلریگه اویوشتیرگن هلاکتلی هوا هجوملریگه مناسبت بیلدیرر اېکن، «پاکستان و افغانستان اۉرته‌سیده دوام اېته‌یاتگن حربي تۉقنه‌شوولر همده اونینگ تینچ اهالی، جمله‌دن، باله‌لرگه تأثیری» یوزه‌سیدن خواطر بیلدیرگن.
اېلچیخانه بوگون (شنبه،۱۱ میزان) ایکی صحیفه‌سیده شونده‌ی یازگن: «سۉنگگی واقعه‌لردن بیری ۱-اکتوبرگه اۉتر کېچه‌سی افغانستان‌نینگ هلمند و کنر ولایتلریگه اویوشتیریلگن هوا هجوملریدیر. نتیجه‌ده بیر قطار آدملر، جمله‌دن، باله‌لر هلاک بۉلگن، ینه بیر قطار کیشی یره‌لنگن.»
پاکستان پنج‌شنبه کونی تانگده کنر و هلمند ولایتلریده‌گی نشانلرگه هوا هجوملرینی عملگه آشیرگن.
پاکستان اخبارات و نشرلر وزیرلیگی بیانات بېریب، هجوملرده پاکستانلیک گروهلرنینگ یشیرین جایلری و باش‌پناه‌لری نشانگه آلینگنی همده نتیجه‌ده ۲۲ نفر «ترورچی» اۉلدیریلگنینی معلوم قیلگن.
بیراق طالبان مطبوعات سوزلاوچیسی ذبیح‌الله مجاهد نینگ ایتیشیچه، پاکستان اوچاقلری کنر نینگ شلتن تومنیده‌گی چوگام و هلمندمینگ گرمسېر تومنیده‌گی سفر حدودلریده تینچ اهالی‌نینگ اویلرینی بامباردمان قیلگن. اونینگ سۉزلریگه کۉره، بو نینگ عاقبتیده عیاللر و باله‌لرنی اۉز ایچیگه آلگن جمع‌ی تۉقّیز کیشی هلاک بۉلگن، ۱۱ کیشی یره‌لنگن و اوچته اوی ویران بۉلگن.
بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) پاکستان نامینی تیلگه آلمه‌گن حالده، اوشبو هوا هجوملری عاقبتیده کمیده ۱۰ نفر تینچ فقرا هلاک بۉلگنینی تصدیقله‌گن.
