طالبلرنینگ تخار ولایتیده‌گی محلي رسميلری آلتین کانی نینگ قوله‌شی عاقبتیده بېش ایشچی هلاک بۉلگنینی تصدیقله‌دی.
طالبلرنینگ تخار ولایتی امنیه قوماندانلیگی مطبوعات و جماعتچیلیک بیلن علاقه‌لر بۉلیمی باشلیغی نقیب‌الله مسرورنینگ ایتیشیچه، چاآب اولسواللیگی‌نینگ دره‌‌ی شاه‌مستان حدودیده‌گی کان قوله‌ب توشگن.
او حادثه قچان یوز بېرگنی حقیده معلومات بېرمه‌گن و قۉشیمچه تفصیلاتلر کېینراق اعلان قیلینیشینی بیلدیرگن.
اۉتگن هفته هم تخارنینگ چاآب اولسواللیگی‌ده‌گی آلتین کانی‌نینگ قوله‌شی عاقبتیده ۱۰ ایشچی ویرانه‌لر آستیده قالگن اېدی. اولر ایکّی کوندن سۉنگ ویرانه‌لر آستیدن قوتقریلگن.
کانلرنینگ قوله‌شی، گازدن زهرلنیش و پارتلشلر افغانستان کانلریده تېز-تېز اوچره‌یدیگن حادثه‌لردن حسابلنه‌دی. کان قزیب آلیش و خوفسیزلیک قاعده‌لریگه رعایه قیلمسلیک اوشبو هلاکتلی حادثه‌لر نینگ اساسي سببلری صفتیده کۉرسه‌تیله‌دی.
