طالبلرنینگ تشقی ایشلر وزیری امیرخان متقی بیرلشگن ملتلر تشکیلاتی‌نینگ باش کاتبی‌نینگ اۉرین‌باسری رزماری دیکارلو بیلن دوحه جریانی دایره‌سیده ینگی امکانیتلرنی تاپیش یۉللری حقیده مذاکره اۉتکزدی.
طالبلرنینگ تشقی ایشلر وزیرلیگی بوگون، شنبه، ۱۱ میزان کونی متقی‌نینگ رازمری دیکرلا بیلن کابلده اوچره‌شگنینی معلوم قیلدی.
مذکور وزیرلیک بیاناتیگه کۉره، اوچره‌شووده افغانستان و بیرلشگن ملتلر تشکیلاتی اۉرته‌سیده‌گی همکارلیک‌نینگ عمومي حالتی، انسانپرورلیک یاردملری، قَیتیب کېله‌یاتگن مهاجرلرنینگ احتیاجلرینی قاندیریش و اولرنی قَیته جمعیتگه انتیگراسیون قیلیش بۉییچه بیرگه‌لیکده‌گی و موافقلشتیریلگن سعی-حرکتلرنینگ اهمیتی، شونینگدېک، اقلیم اۉزگریشی و سوو ساحه‌لریده‌گی همکارلیکنی کېنگه‌یتیریش ضرورتی محاکمه قیلینگن.
طالبلر تشقی ایشلر وزیرلیگی بیاناتیده ایتیلیشیچه، تامانلر دوحه جریانی دایره‌سیده ینگی امکانیتلرنی قنده‌ی تاپیش مسأله‌سینی محاکمه قیلگن و عملي نتیجه‌لرگه آلیب کېله‌دیگن همده آدملر حیاتیگه ایجابي تأثیر کۉرسه‌ته‌دیگن همکارلیک‌نینگ مهم‌لیگینی تأکیدله‌گن.
دوحه جریانی بیرلشگن ملتلر تشکیلاتی میزبانلیگیده قطر پایتختیده اۉتکزیلگن بیر قطار اوچره‌شوولردن عبارت جریاندیر.
بیرلشگن ملتلر تشکیلاتی رسميلری اوشبو جریاننی افغانستانده‌گی مهم سیاسي مسأله‌لرنی محاکمه قیلیش‌نینگ اساسي دایره‌سی دېب بیله‌دی. اولرنینگ ایتیشیچه، بو دایره خلق‌ارا و منطقوي تامانلرنی طالبلر رسميلری بیلن تیزیملی ملاقات آلیب باریش اوچون بیرلشتیره‌دی و بیرلشگن ملتلر تشکیلاتی خوفسیزلیک کېنگشی تامانیدن معقوللنگن مقصدگه اېریشیشگه خدمت قیله‌دی.
طالبلر تشقی ایشلر وزیرلیگی بیاناتی‌نینگ دوامیده متقی و بیرلشگن ملتلر تشکیلاتی باش کاتبی‌نینگ اۉرین‌باسری اۉرته‌سیده‌گی صحبتده افغانستان حقیده‌گی گزارشلر، بیاناتلر و بهالشلرنی امکان قدَر انیق و موازنتلی یاریتیش اوچون ایشانچلی منبعلر همده انیق معلوماتلردن فایده‌لنیش مهم‌لیگی تأکیدلنگنی ایتیلگن.
شونینگدېک، پاکستان نینگ هوا هجوملری عاقبتیده تینچ اهالیگه ضرر یېته‌یاتگنی حقیده‌گی خواطرلر هم کۉتریلگن و تینچ اهالینی حمایه قیلیش همده بونده‌ی ضررلر نینگ آلدینی آلیش مهم‌لیگی حقیده فکر المشیلگن.
بیرلشگن ملتلر تشکیلاتی حاضرچه اوشبو اوچره‌شوو یوزه‌سیدن هېچ قنده‌ی بیانات بېرگنی یۉق.
