طالبانلرنینگ ننگرهار ولایتی امنیه قوماندانلیگی‌نینگ معلوم قیلیشیچه، اوشبو ولایت‌نینگ «بتی کوت» اولسواللیگی‌ده اولر بۉلگن مو‌تر تصادم‌گه اوچره‌شی عاقبتیده بیر عایلهنینگ اوچ اعضاسی هلاک بۉلگن، ینه اوچ کیشی جراحتلنگن.
اوشبو قوماندانلیک‌نینگ بیلدیریشیچه، حادثه بوگون (یک‌شنبه، ۱۲ میزان) ساعت تخمیناً ۱۱:۰۰ ده بتی کون اولسواللیگی‌نینگ «تۉرتینچی فاز» حدودیده «ویتز» و «کراسرود» روسوملی ایکّی موترنینگ تۉقنه‌شووی عاقبتیده صادر بۉلگن.
طالبانلرنینگ ننگرهارده‌گی امنیه قوماندانلیگی معلوماتیگه کۉره، حادثه‌ده هلاک بۉلگنلر مومند دره اولسواللیگی‌نینگ «انبارخانه» قیشلاغی اهالیسی بۉلیب، بیر عایله نینگ اعضالری بۉلگن.
قوماندانلیک قۉشیمچه قیلیشیچه، جراحتلنگنلر دوالنیش اوچون شفاخانه‌گه آلیب کېتیلگن.
حادثه‌‌نینگ سببی حقیده معلومات بېریلمه‌گن.
افغانستان‌ده ترافیک حادثه‌لری هر ییلی یوزلب کیشی‌نینگ حیاتیگه ضامن بۉله‌دی و یوزلب آدملر جراحتلنه‌دی. اوشبو حادثه‌لر‌نینگ اکثریتیگه هیداوچیلر نینگ احتیاطسیزلیگی، یۉل بېلگیلری نینگ یۉقلیگی و یۉللر نینگ ناسازلیگی سبب بۉلیشی ایتیله‌دی.
یقینده طالبلر رهبری ترافیک حادثه‌لریگه سبب بۉلگن شخصلرنی حبسگه آلیش و جزالش حقیده بویروق بېرگن اېدی. شونگه قره‌مه‌ی، بو بویروق حادثه‌لر سانی نینگ کمه‌ییشیگه آلیب کېلمه‌دی و مملکت نینگ تورلی ولایتلریدن بونده‌ی حادثه‌لر هر کونی خبر قیلینماقده.
