طالبلرنینگ بدخشان ولایتیده‌گی واليسی رحمت‌الله نجیب اگر کیمدیر بو گروه رژیمیگه قرشی «سلبي حرکت» قیلسه، اۉلدیریلیشی یاکه اسیر آلینیشی حقیده آگاهلنتیردی.
او بو بیاناتلرنی بوگون (یک‌شنبه، ۱۲ میزان) واخان یۉله‌گی توپراق یۉلی‌نینگ آچیلیش مراسمیده ایتدی.
طالبلرنینگ بو رسميسی هېچ کیم اوشبو گروه حکومتیگه قرشی بیرار حرکت قیله آلمه‌سلیگینی بیلدیردی.
بدخشان طالبلرگه قرشی کوچلر اۉز اشتراکی بارلیگینی بیلدیره‌یاتگن ولایتلردن بیریدیر.
بیر نېچه ساعت اوّل «افغانستان ملي قرشیلیک جبهه‌سی» فیض آباد شهریده طالبان استخبارات باشلیغی‌نینگ اۉرین‌باسریگه قرشی اویوشتیریلگن هجوم حقیده خبر بېریب، بو طالبلر رسميسی ایکّی نفر قۉریقچیسی بیلن بیرگه اۉلدیریلگنینی معلوم قیلگن اېدی.
طالبلرگه قرشی کوچلردن تشقری، بیر نېچه کون اوّل بدخشان‌نینگ نسی حدودیده بو گروه‌نینگ ناراضی قوماندانی جمعه‌خان فاتح جَنوبي ولایتلردن کېلگن طالبلر جنگریلری بیلن تۉقنه‌شگن اېدی. بیراق بیر نېچه کونلیک جنگلردن سۉنگ او تسلیم بۉلیب، قورالسیزلنتیریلدی. فاتح‌نینگ تقدیری حاضرگچه نامعلوم. طالبان اعضالری اونی «عصیانچی» دېب اتشگن.
