ایران تشقی ایشلر وزیرلیگی مطبوعات سوزلاوچیسی اسماعیل بقایی، بو مملکت افغانستانده‌گی شیعه‌لرگه تېگیشلی مؤسسه‌لرنی یاپیش مسأله‌سینی طالبلر بیلن محاکمه قیلگنینی ایتدی.
ایران تشقی ایشلر وزیرلیگی مطبوعات سوزلاوچیسی بوگون (یک‌شنبه، ۱۲-میزان) بو باره‌ده‌گی سوالگه جوابن شونده‌ی دېدی: «بو خبرلر و معلوماتلرنی بیز هم آلدیک. بو مسأله بیز اوچون جوده مهم و بیز کابلده‌گی تېگیشلی رسميلر بیلن ملاقاتده بو موضوعنی کۉتردیک. البته، بوندن کېین هم بو مسأله‌نی جدّي طرزده کۉتریشده دوام اېته‌میز.»
طالبلر سۉنگگی پیتلرده کابل‌نینگ غربیده ابراندن قۉللب-قوّتلنگن بیر نېچه دیني، تعلیمي، مدني مؤسسه و بیر کلنیکنی یاپدی همده اوشبو مؤسسهلرنینگ اَیریم مسووللرینی حبسگه آلدی.
خاتم النیین دیني مدرسه‌سی، «تمدن» تلویزیونی، «راه فردا» رادیو تلویزیونی، خاتم اولانبیا دیني مکتبی، خاتم النبیین بیلیم یورتی، «افغان آوازی» (آوا) اخبارات آژانسی و «تبیان» مدنیت مرکزی یقینده طالبان تامانیدن یاپیلگن مؤسسه‌لر جمله‌سیدندیر.
طالبلر شونینگدېک، «شیعه‌لر عالي کمیسیونی»نی یاپدی و اونینگ رهبری همده اعضالرینی بیر مدت حبسده سه‌قله‌دی.
بوندن تشقری، بو گروه شیعه و هزاره‌لر استقامت قیله‌دیگن بیر نېچه شهرچه‌نی، جمله‌دن، کابل‌نینگ غربیده جایلشگن «امید سبز» شهرچه‌سینی «امارتگه تېگیشلی» دېب اعلان قیلیب، او یېرده‌گی اهالیگه حدودنی ترک اېتیش حقیده بویروق بېرگن.
اوشبو مؤسسهلرنینگ کۉپچیلیگی طالبلرنینگ عدلیه وزیری عبدالحکیم شرعی بویروغی بیلن یاپیلگن، حبسگه آلینگن شخصلر اېسه اونینگ شخصي قماقخانه‌سیده سه‌قلنگن.
