بیرلشگن ملتلر تشکیلاتی‌نینگ افغانستانده‌گی یاردم اداره‌سی (یوناما) «بوتون جهان اۉقیتووچیلر کونی» مناسبتی بیلن نشر قیلگن پیامیده افغانستان اۉقیتووچیلری، اینیقسه قیشلاق و چېکّه حدودلرده چېکلنگن امکانیتلر و کۉپلب قیینچیلیکلرگه قره‌مه‌ی، تعلیم بېره‌یاتگنینی ایتدی.
یوناما بوگون (دوشنبه، ۱۳میزان) اجتماعي ترماقلرده نشر قیلگن پیامیده شونده‌ی دېدی: «افغانستان اۉقیتووچیلری، اینیقسه مملکت نینگ قیشلاق و چېکّه حدودلریده، آغیر شرایطلر، چېکلنگن امکانیتلر و کۉپلب قیینچیلیکلرگه قره‌مه‌ی، مسوولیت و فداییلیک بیلن تعلیم بېریشده دوام اېتماقده.»
بیرلشگن ملتلر تشکیلاتی نماینده‌لیگی اوشبو اۉقیتووچیلرگه حرمت بجا کېلتیریب، اولرگه علیحده منّتدارلیک بیلدیردی.
یوناما تعلیم بېریش، الهاملنتیریش و یۉل-یۉریق کۉرسه‌تیش آرقه‌لی انسانلر حیاتینی ترقیات سری یېته‌کله‌یاتگن همده «تینچ و فراوان جمعیتلر» اوچون پای‌دېوار یره‌تیشده قیمتلی رۉل اۉینه‌یاتگن اۉقیتووچیلرگه منّتدارلیک بیلدیردی.
اوشبو تشکیلات بوگونگی کونده بسمه آنگ، اجتماعي ترماقلر همده ناتۉغری و چلغیتووچی اخباراتلر‌نینگ ترقه‌لیشی تاباره کوچه‌ییب باره‌یاتگن بیر پیتده اۉقیتووچیلرنینگ رۉلی هر قچانگیدن هم مهم اهمیت کسب اېته‌یاتگنینی تأکیدله‌دی.
بوتون‌جهان اۉقیتووچیلر کونی افغانستانده مینگلب اۉقیتووچیلر جنسیگه کۉره، اۉقووچیلری اېسه تعلیم آلیش امکانیتیدن محروم اېتیلگنیگه بېش ییل بۉلگن بیر پیتده نشانلنماقده.
طالبلر عیاللر و قیزلرنینگ مکتب‌نینگ آلتینچی صنفیدن یوقاری باسقیچلرده تعلیم آلیشینی تعقیقله‌گنیدن سۉنگ، بیرلشگن ملتلر تشکیلاتی حساباتیگه کۉره، قریب ۲.۶میلیون قیز تعلیم آلیشدن محروم بۉلگن.
بیرلشگن ملتلر تشکیلاتی‌نینگ باله‌لر جمغرمه‌سی (یونیسف) نینگ معلوم قیلیشیچه، طالبلر ۷ مینگ نفر عیال اۉقیتووچینی ایشدن چېتله‌تیشی نتیجه‌سیده عیال اۉقیتووچیلر سانی ۲۰۲۲-ییلده‌گی ۷۳ مینگ نفردن ۲۰۲۴-ییلده ۶۶مینگ نفرگه کمه‌یگن. افغانستان ۲۰۳۰-ییلگچه قریب ۲۰مینگ عیال اۉقیتووچینی یۉقاتیشی ممکن.
