طالبلرنینگ تشقی ایشلر وزیری امیرخان متقي پاکستان اوردوسی افغانستان و منطقه‌ده‌گی برقرارلیکنی ایزدن چیقریش اوچون ینگی لایحه باشله‌گنینی ایتدی.
طالبلر تشقی ایشلر وزیری بوگون (دوشنبه، ۱۳ـ میزان) روسيه‌ده بۉلیب اۉته‌یاتگن «مسکو فرمتی» ییغیلیشیده سۉزلر اېکن، پاکستان دیورند چیزیغی یقینیده افغانستان‌نینگ سابق حربيلری و «اسلامي دولت» (داعش) اعضالریدن مینگلب کیشینی تۉپله‌گنینی، بو آرقه‌لی افغانستان‌ده یوزه‌گه کېلگن برقرارلیککه قرشی چیقیشنی مقصد قیلگنینی دعوا قیلدی.
او، شونینگدېک: «اولرنینگ نورستان، بدخشان و باشقه اَیریم حدودلرده‌گی موفقیتسیز حرکتلری برچه‌نگیز نینگ کۉز اۉنگینگیزده»، دېدی.
طالبلر تشقی ایشلر وزیری اوشبو ییغیلیشده طالبلر پاکستان بیلن موجود سیاسي، خوفسیزلیک و اقتصادي معمالر مذاکره و دیپلوماتيک آرقه‌لی حل قیلینیشی ممکن، دېب حسابلشینی هم بیلدیردی.
اونینگ ایتیشیچه، طالبلر افغانستان‌ده پاکستان بیلن قره‌مه-قرشیلیکنی ایسته‌مه‌یدی، بیراق «پاکستان حربي رژیمی» سیاسي کېلیشوو اۉرنیگه حربي تیلدن فایده‌لنماقده.
متقی طالبان «هېچ قچان باسیم نتیجه‌سیده اۉزی‌نینگ اساسي سیاستیدن واز کېچمسلیگینی و هر قنده‌ی تجاوزگه قرشی مدافعه قیلیشنی اۉزی‌نینگ قانوني حقوقی دېب بیلیشینی» تأکیدله‌دی.
طالبلر و پاکستان اۉرته‌سیده‌گی ترنگلیک و تۉقنه‌شوولر قریب بیر ییلدن بېری دوام اېتماقده. سۉنگگی حالتده، پاکستان اۉتگن هفته افغانستان‌نینگ ایکّی ولایتینی بامباردمان قیلدی. بیرلشگن ملتلر تشکیلاتی‌نینگ معلوماتلریگه کۉره، اوشبو هجوملرده کمیده ۱۰ نفر تینچ اهالی هلاک بۉلگن و ینه تۉقّیز نفر تینچ اهالی جراحتلنگن.
طالبلر پاکستان هجوملریگه «مناسب جواب» بېریشینی بیلدیرگن، بیراق بونینگ تفصیلاتلری یاکه قنده‌ی جواب بېریلیشی حقیده هېچ قنده‌ی معلومات بېرمه‌گن. حاضرگچه بو جواب عملگه آشیریلگنی حقیده هم خبر ترقه‌لمه‌گن.
طالبلر تشقی ایشلر وزیری نطقی نینگ باشقه بیر قِسمیده اوشبو گروه افغانستان‌ده ینه حاکمیتنی اېگه‌لله‌گنیدن سۉنگ خوفسیزلیک و برقرارلیکنی تأمینله‌گنی، «اسلامي دولت» و گیاهوند مادّه‌لرنی یۉق قیلگنی، منطقه و دنیانینگ خوفسیزلیک باره‌سیده‌گی خواطرلریگه برهم بېرگنی همده افغانستاننی اقتصادي تیکلنیش و منطقوي همکارلیک سری آلیب باره‌یاتگنینی ایتدی.
او منطقه‌‌نینگ کېله‌جگینی خوفسیزلیک باره‌سیده‌گی رقابت اېمس، بلکه عمومي خوفسیزلیک، اقتصادي انتیگراسیون و منطقوي باغلیقلیک اساسیده، باسیم اۉرنیگه اېسه ملاقات و اۉزارا انگلشوو آرقه‌لی قوریشگه چقیردی.
بو پیتده بیرلشگن ملتلر تشکیلاتی‌نینگ چېکلاولرنی مانیتورینگ قیلیش کمیته‌سی معلوماتلریگه کۉره، «القاعده»، «اسلامي دولت» و «پاکستان طالبان حرکتی» (تی‌تی‌پی) کبی ترورچی گروهلر هنوز افغانستان‌ده فعالیت یوریتماقده و قۉشنی دولتلر، منطقه همده دنیا خوفسیزلیگیگه تهدید سالماقده.
