روسيه تشقی ایشلر وزیرلیگی روسيه تشقی ایشلر وزیری سرگی لاوروف نینگ مسکوده اۉتکزیلگن «مسکو فرمتی» نینگ سکّیزینچی ییغیلیشی دایره‌سیده طالبلر تشقی ایشلر وزیری امیرخان متقي بیلن اوچره‌شگنینی معلوم قیلدی.
روسيه تشقی ایشلر وزیری اوشبو اوچره‌شووده افغانستان بۉییچه «مسکو فرمتی» مصلحتلشوو ییغیلیشلریده طالبلرنینگ «بې‌واسطه اشتراکی»گه روسيه «کتّه اهمیت بېریشینی» ایتگن.
اونینگ قۉشیمچه قیلیشیچه، روسيه بو فرمتنی «افغانستان و اونینگ اطرافیده‌گی منطقه آلدیده تورگن معمالرنی حل قیلیش اوچون اېنگ ثمره‌لی میدان» دېب بیله‌دی. لاوروف‌نینگ ایتیشیچه، بو نینگ سببی فقط اونینگ نامیده «مسکو» سۉزی بارلیگی اېمس، بلکه بو فرمت آرقه‌لی انیق نتیجه‌لرگه اېریشیلگنیده‌دیر.
روسيه تشقی ایشلر وزیرلیگی بیاناتیگه کۉره، لاوروف اوشبو اوچره‌شووده افغانستان نینگ ناتو حربي کوچلری اشتراکیدن آزاد بۉلگنی نینگ «بېش ییللیگی» مناسبتی بیلن طالبان تشقی ایشلر وزیرینی تبریکله‌گن و گروه نینگ «یوتوقلری» دېب اته‌لگن نتیجه‌لرنی آلقیشله‌گن.
روسيه تشقی ایشلر وزیرلیگی اوشبو اوچره‌شووده طالبلر تامانی نینگ قره‌شلری حقیده معلومات بېرمه‌گن.
طالبلر تشقی ایشلر وزیرلیگی هم حاضرچه اوشبو اوچره‌شوو حقیده خبر نشر قیلمه‌گن.
«مسکو فرمتی» نینگ سکّیزینچی ییغیلیشی بوگون روسيه پایتختیده بۉلیب اۉتدی. بیراق طالبان و پاکستان اۉرته‌سیده‌گی کېلیشماوچیلیکلر سببلی ییغیلیش قۉشمه بیانات قبول قیلینمسدن یکونلندی.
