بیرلشگن ملتلر تشکیلاتی باش کاتبی نینگ سیاسي و تینچلیک مسأله‌لری بۉییچه اۉرین‌باسری رزماری دی‌کارلو بوگون (دوشنبه، ۱۳-میزان) افغانستانگه سفرینی یکونله‌دی.
اونینگ اداره‌سی تامانیدن نشر قیلینگن بیاناتده ایتیلیشیچه، دی‌کارلو خانیم طالبان رسميلری بیلن اوچره‌شووده بیرلشگن ملتلر تشکیلاتی‌نینگ دوحه جریانینی ایلگری سوریشگه صادق اېکنینی بیلدیرگن. او گیاهوند مادّه‌لرگه قرشی کوره‌ش و خصوصي سکتورنی قۉللب-قوّتلش بۉییچه ایکّی ایشچی گروه فعالیتیده‌گی آلدینگه سیلجیشگه اشاره قیلیب، مذاکره‌لرنی افغانستان خلقی اوچون ینه‌ده کۉپراق عملي نتیجه‌لرگه ایلنتیریش مهم‌لیگینی تأکیدله‌گن.
بیاناتگه کۉره، تامانلر اوچره‌شوولرده «اۉزارا ملاقات و همکارلیکنی دوام اېتتیریشگه صادقلیکلرینی» تأکیدله‌گنلر.
دی‌کارلو خانیم نینگ اداره‌سی قۉشیمچه قیلیشیچه، او بیرلشگن ملتلر تشکیلاتی‌گه اعضا دولتلر نینگ عیاللر و قیزلر، خصوصاً، قیزلر نینگ تعلیم آلیش امکانیتلری باره‌سیده‌گی خواطرلرینی هم طالبانگه یېتکزگن.
بیاناتگه کۉره، او عیاللر و قیزلر حقوقلری باره‌سیده‌گی ترقیات افغانستان نینگ رواجلنیشیگه یاردم بېریشی ممکنلیگینی تأکیدله‌گن.
بیرلشگن ملتلر تشکیلاتی باش کاتبی نینگ سیاسي و تینچلیک مسأله‌لری بۉییچه اۉرین‌باسری، شونینگدېک، افغانستانلیک عیال بمت خادملری نینگ مملکت بۉیلب بمت اداره‌لریگه کیریشی تعقیقلنگنی مسأله‌سینی هم طالبلر بیلن محاکمه قیلگن.
او افغانستان آلدیده تورگن اجتماعي و اقتصادي باسیملر، اقلیم اۉزگریشی همده طبيعي آفتلر کبی معمالرگه اورغو بېریب، قۉشنی دولتلردن افغانستانگه قَیتیب کېله‌یاتگن افغانلرگه یاردم کۉرسه‌تیشگه بیرلشگن ملتلر تشکیلاتی تیار اېکنینی بیلدیرگن.
دی‌کارلو خانیم فقرالیک جمعیتی وکیللری و عیال یېتکچیلر بیلن اوچره‌شوولریده اولر نینگ بوتون افغانستان جمعیتلریده‌گی مهم رۉلی و اشتراکینی تأکیدلب، بو باره‌ده‌گی قیمتلی حصه‌لرینی اعتراف اېتگن.
بیرلشگن ملتلر تشکیلاتی باش کاتبی نینگ سیاسي و تینچلیک مسأله‌لری بۉییچه اۉرین‌باسری طالبان افغانستانده حاکمیتنی قَیته قۉلگه کیریتگنیدن بېری مملکتگه بېشینچی بار تشریف بویورگن اېدی. او کابل‌ده طالبلر تشقی ایشلر وزیری امیرخان متقي و قندهارده طالبلر مطبوعات سوزلاوچیسی ذبیح‌الله مجاهد بیلن اوچره‌شیب، مذاکره‌لر اۉتکزگن.
دی‌کارلو خانیم افغانستان بۉییچه دوحه جریانی نینگ اوچینچی اوچره‌شوویگه رهبرلیک قیلگن. اوشبو اوچره‌شوو طالبان رسميلری اشتراکیده، اما افغانستانلیک عیاللر و فقرالیک جمعیتی وکیللریسیز اۉتکزیلگن.
عیاللر و فقرالیک جمعیتی وکیللری اشتراکیسیز اۉتکزیلگن اوشبو اوچره‌شوو کېنگ تنقیدلرگه سبب بۉلگن. کۉپلب تنقیدچیلر بیرلشگن ملتلر تشکیلاتی طالبلرنی «لېگیتیملشتیریش»ده عیبله‌گن.
