طالبلر مطبوعات سوزلاوچیسی ذبیح‌الله مجاهد خلق‌ارا جنایت محکمه‌سی نینگ اوشبو گروه عملدارلرینی حبسگه آلیش حقیده‌گی قراری تۉغریسیده‌گی بیاناتیگه مناسبت بیلدیرر اېکن، «افغانستان هېچ بیر محکمه‌نی خلق‌ارا جنایت محکمه صفتیده تن آلمه‌یدی و اونینگ موضعلریگه هېچ قنده‌ی اهمیت بېرمه‌یدی»، دېدی.
مجاهد ایکس‌ده‌گی پیامیده طالبلر مأموریتی اوشبو گروه رهبری و ینه اوچ نفر عملدارینی حبسگه آلیش اوچون قرار چیقریلگنینی قاره‌لشینی یازگن.
طالبلر مطبوعات سوزلاوچیسی بو گروه رهبرلری «بیرار محکمه تامانیدن حبسگه آلینیشی یاکه جزالنیشیگه سبب بۉله‌دیگن هېچ قنده‌ی ایش قیلمه‌گن»، دېب ایتگن.
خلق‌ارا جنایت محکمه بوگون لاهه طالبلرنینگ تۉرت نفر عملداریگه، جمله‌دن، اوشبو گروه رهبریگه نسبتاً چیقریلگن حبس قرارلرینی آشکار قیلدی.
بو تۉرت کیشی آره‌سیده طالبلر نینگ معارف همده عالي تحصیلات وزیرلری هم بار.
خلق‌ارا جنایت محکمه نینگ بیاناتیگه کۉره، حبیب‌الله آغا و ندا محمد ندیمگه نسبتاً حبس قراری ۲۰۲۵-ییل سپتمبر آییده چیقریلگن، بیراق بوگونگچه مخفي سقلنگن.
خلق‌ارا جنایت محکمه بوگونگی بیاناتیده محکمه نینگ ایکّینچی دستلبکی پله‌ته‌سی اوشبو تۉرت گماندار رم ستاتوتی اساسیده انسانیتگه قرشی جنایت — تعقیبنی صادر اېتیشگه بویروق بېریش، اونده‌ش یاکه رغبتلنتیریش اوچون جنایي جوابگرلیککه تارتیلیشی ممکنلیگیگه ایشانیش اوچون اساسلی دلیللر موجودلیگینی انیقله‌گنینی بیلدیرگن. بو تعقیب قیزلر، عیاللر همده طالبلرنینگ جندر سیاستیگه ماس کېلمه‌یدیگن باشقه شخصلرگه جنسی اساسیده قۉللنگن.
خلق‌ارا جنایت محکمه‌نینگ ایکّینچی دستلبکی پله‌ته‌سی گماندارلر طالبلر نامیدن سیاست یوریتگنینی و بونینگ نتیجه‌سیده افغانستانده‌گی تینچ اهالی‌نینگ اساسي حقوق و اېرکینلیکلری جدّي روشده بوزیلگنینی ایتگن. بو بوزیلیشلر قاتللیک، قماققه آلیش، قییناققه سالیش، جنسي زۉرآورلیک و مجبوري غایب قیلیش حالتلرینی اۉز ایچیگه آله‌دی.
طالبلر مطبوعات سوزلاوچیسی بو گروه «استخبارات اداره‌لری و ساخته نامده‌گی محکمه‌لرگه اېمس، بلکه اسلام شریعتی قاعده‌لری و اونینگ محکمه‌لریگه بۉیسونه‌دی»، دېب ایتگن.
اوشبو گروه خلق‌ارا جنایت محکمه‌سیدن «اۉزی نینگ آبروسی و نفوذینی سه‌قلب قالیش اوچون وکالتی و حقوقلری دایره‌سیدن تشقریگه چیقه‌دیگن دعوالرنی ایلگری سورمسلیکنی» سۉره‌گن.
