بیرلشگن ملتلر تشکیلاتی باش کاتبی آنتونیو گوترش حماس نینگ اسرایلگه قرشی «توفان الاقصی» عملیاتی‌نینگ اوچ ییللیگی مناسبتی بیلن یۉلله‌گن پیامیده بونده‌ی فاجعه‌لر باشقه هېچ قچان تکرارلنمسلیگی کېره‌کلیگینی ایتدی.
بیرلشگن ملتلر تشکیلاتی‌نینگ باش کاتبی ایکس اجتماعي ترماغیده نشر قیلگن بیاناتیده اوشبو هجوم و اوندن کېینگی ماجرا عامه‌وي قاتللیک، ویرانه‌گرچیلیک، مجبوري کۉچیش و دهشتلی جنایتلرگه سبب بۉلگنینی تأکیدله‌دی.
اوچ ییل اوّل، ۲۰۲۳-ییل ۷-اکتوبر کونی حماس و باشقه فلسطین قوراللی گروهلری اسرایلگه قرشی کېنگ کۉلملی هجوم باشله‌گن. هجوم عاقبتیده ۱ مینگ ۲۰۰ دن آرتیق اسرایللیک و خارجي فقرا هلاک بۉلگن، ینه ۲۵۱ کیشی، جمله‌دن عیاللر، باله‌لر و کېکسه‌لر اۉغیرلنیب، غزاگه آلیب کېتیلگن.
بیرلشگن ملتلر تشکیلاتی باش کاتبی‌نینگ ایتیشیچه، حماس بو آدملرنی اسیرلیک دوریده قییناقلر، تحقیرلش و جنسي زۉرآورلیک کبی دهشتلی معامله‌لرگه دچار قیلگن. اولر نینگ اَیریملری گروگه آلگنلر تامانیدن یاکه کېینگی تۉقنه‌شوولر دوامیده اۉلدیریلگن.
گوترش تأکیدله‌گنیدېک، «هېچ نرسه بو دهشتلی جنایتلرنی آقله‌ی آلمه‌یدی و بونده‌ی فاجعه‌لر باشقه هېچ قچان تکرارلنمسلیگی کېره‌ک».
بیرلشگن ملتلر تشکیلاتی‌نینگ باش کاتبی غزه‌ده کېینچه‌لیک دوام اېتگن ماجرا حقیده گپیرر اېکن، اسرایل‌نینگ بو حدودگه قیلگن هجوملری فلستطینلیکلرگه «بې‌حساب عذاب-عقوبتلر، جمله‌دن، کتّه مقدارده‌گی انساني تلفاتلر، مجبوري کۉچیش و ویرانه‌گرچیلیکلرنی» کېلتیریب چیقرگنینی ایتدی.
اونینگ قۉشیمچه قیلیشیچه، تینچ اهالی همان «چیده‌ب بۉلمس» شرایطلرده یشه‌ماقده و اولرنینگ عذاب-عقوبتلری حاضراق توگه‌تیلیشی کېره‌ک.
گوترش اۉتگن ییلی اېریشیلگن و ماجرا مقیاسینی قسماً کمه‌یتیرگن صلحنی یېترلی اېمس دېب بهاله‌دی. اونینگ ایتیشیچه، تامانلر نینگ مجبوريتلرگه رعایه قیلمه‌گنی سببلی اوشبو صلح حاضرگچه خوفسیزلیکنی، یېترلی مقدارده‌گی انسان‌پرورلیک یاردمنی یاکه تیکلنیش و تینچلیک اوچون ایشانچلی یۉلنی تأمینله‌ی آلمه‌دی.
بیرلشگن ملتلر تشکیلاتی‌نینگ باش کاتبی اسرایل حکومتی و حماسنی اۉز مجبوريتلرینی تۉلیق بجریشگه همده «غزه ماجراسینی توگه‌تیش بۉییچه کېنگ قمراولی رېجه» اساسیده صلح نینگ کېینگی باسقیچیگه اۉتیشگه چقیردی.
او غزه‌ده «دایمي صلح» اۉرنه‌تیلیشینی طلب قیلدی و اسرایلنی خلق‌ارا حقوققه حرمت بیلن مناسبتده بۉلیشگه همده غزه اهالیسی اوچون کېنگ کۉلملی گومانیتار یاردم یېتکزیلیشیگه رخصت بېریشگه چقیردی.
گوترش اسرایللیکلر و فلسطینلیکلر تینچلیک و خوفسیزلیکده، اۉز حقوقلری، قدر-قیمتی و آرزو-اینتیلیشلری تأمینلنگن حالده یانمه-یان یشه‌ی آله‌دیگن کېله‌جک برپا اېتیلیشی کېره‌کلیگینی ایتدی.
سۉنگگی معلوماتلرگه کۉره، حماس نینگ ۷-اکتوبر کونی اسرایلگه قیلگن هجومیدن کېین اسرایل‌نینگ جواب هجوملریده ۷۴مینگ ۲۴۳ نفر فلسطینلیک هلاک بۉلگن، ۱۷۵ مینگدن آرتیق کیشی یره‌لنگن و غزه سکتوریده‌گی قریب ایکّی میلیون اهالی نینگ دېیرلی برچه‌سی اوی-جایینی ترک اېتیشگه مجبور بۉلگن.
اۉتگن ییلی امریکا قظر و مصر واسطه‌چیلیگیده صلحگه اېریشیلگن و شوندن سۉنگ «غزه تینچلیک کېنگشی» تشکیل اېتیلگن. بیراق اوشبو تشبثدن کېین هم اسرایل‌نینگ بو حدودگه هجوملری دوام اېتگن. سۉنگگی معلوماتلرگه کۉره، سۉنگگی بیر ییل ایچیده ۱ مینگ ۴۶۰ کیشی هلاک بۉلگن و ینه ۵ مینگ ۱۶۶کیشی یره‌لنگن.
