رواداری انسان حقوقلری تشکیلاتی خلق‌ارا جنایی محکمه تامانیدن طالبلرنینگ تعلیم وزیری حبیب‌الله آغا و عالي تحصیلات وزیری ندا محمدندانی حبسگه آلیش تۉغریسیده‌گی قراری‌نینگ آشکار اېتیلگنینی آلقیشله‌دی.
اوشبو تشکیلات بیاناتیده مذکور قرارنی «جوابگرلیکنی کوچه‌یتیریش، جزاسیزلیککه قرشی کوره‌شیش و جبرلنووچیلرنینگ عدالتگه اېریشیش حقوقینی تأمینلش یۉلیده مهم و تاریخي قدم» دېب بهاله‌گن.
رَواداری دولتلرنی خلق‌ارا جنایي محکمه قرارینی جدّي قبول قیلیشگه همده خلق‌ارا عدالتنی قۉللب-قوّتلشده‌گی اۉز رۉلی و مسوولیتینی بجریشگه چقیرگن.
اوشبو تشکیلاتگه کۉره، خلق‌ارا محکمه جریانلرینی قۉللب-قوّتلش، جزاسیزلیککه قرشی کوره‌شیش و جبرلنووچیلر نینگ عدالتگه اېریشیشینی تأمینلش خلق‌ارا همجعیت ذمّه‌سیده‌گی عمومي مسوولیت و وظیفه‌لردن بیریدیر.
خلق‌ارا جنایي محکمه کېچه طالبلرنینگ اوشبو ایکّی وزیریگه نسبتاً ۲۰۲۵-ییل سپتمبر آییده چیقریلگن حبسگه آلیش قرارلرینی مخفيلیکدن چیقریب، عامه‌گه نشر قیلدی.
مذکور ۲۰۲۵-ییل جولای آییده طالبلر رهبری هبت‌الله آخوندزاده و عالي محکمه رئیسی عبدالحکیم حقّانيگه هم «جنسگه اساسلنگن انسانیتگه قرشی جنایت صادر اېتیش» عیبلاوی بیلن حبسگه آلیش اۉردرلرینی چیقرگن و اولرنی آشکار قیلگن اېدی.
خلق‌ارا جنایي محکمه نینگ ایکّینچی دستلبکی محکمه پله‌ته‌سی معلوم قیلیشیچه، طالبلرنینگ معارف و عالي تحصیلات وزیرلری اوشبو گروه نامیدن سیاست یوریتگن و بو نینگ نتیجه‌سیده افغانستان فقرالری نینگ اساسي حقوق و اېرکینلیکلری جدّي روشده بوزیلگن. بو بوزیلیشلر قاتللیک، قماققه آلیش، قییناققه سالیش، جنسي زۉرآورلیک و مجبوري غایب قیلیشنی اۉز ایچیگه آله‌دی.
محکمه نینگ تأکیدلشیچه، طالبلر خصوصاً فرمان و قرارلر چیقریش آرقه‌لی قیزلر و عیاللرنی تعلیم آلیش، شخصي حیات و عایله‌وي حیاتگه عاید حقوقلردن، شونینگدېک، حرکتلنیش، فکر بیلدیریش، تفکر، وجدان و دین اېرکینلیکلریدن کېسکین محروم قیلگن.
طالبلر اوشبو اۉردرلر چیقریلگنیگه مناسبت بیلدیرر اېکن، خلق‌ارا جنایي محکمه‌نی تن آلمه‌سلیگینی ایتگن.
