طالبلرنینگ تشقی ایشلر وزیری امیرخان متقي روسيه ملي خوفسیزلیک کېنگشی کاتبی سرگئی شویگو بیلن اوچره‌شیب، مذاکره اۉتکزدی.
طالبلر تشقی ایشلر وزیرلیگی بوگون (سه‌شنبه، ۱۴ مبزان) ترقه‌تگن بیاناتیده تامانلر افغانستان و روسيه اۉرته‌سیده‌گی مناسبتلر، منطقوي خوفسیزلیک، گیاهوند مادّه‌لر سوداسیگه قرشی کوره‌ش همده خوفسیزلیک ساحه‌سیده‌گی همکارلیک مسأله‌لرینی محاکمه قیلگنی ایتیلگن.
طالبلر تشقی ایشلر وزیری بو اوچره‌شووده ایکّی تامان اۉرته‌سیده‌گی سیاسي مناسبتلر جریانینی «ایجابي» دېب بهالب، روسيه‌گه طالبلر حکومتینی تن آلگنی اوچون منّتدارلیک بیلدیرگن.
او، شونینگدېک، خوفسیزلیک ساحه‌سیده‌گی همکارلیکنی ینه‌ده کوچه‌یتیریش و بو باره‌ده منتظم مصلحتلشوولر اۉتکزیش، شونینگدېک، اقتصادي و سودا علاقه‌لرینی رواجلنتیریش مهم‌لیگینی تأکیدله‌گن.
طالبلر تشقی ایشلر وزیرلیگی بیاناتیگه کۉره، روسيه ملي خوفسیزلیک کېنگشی کاتبی مملکتی و طالبلر اۉرته‌سیده‌گی مناسبتلر رواجلنیب باره‌یاتگنینی ایتگن.
بیاناتگه کۉره، او ایکّی تامان اۉرته‌سیده‌گی سیاسي مصلحتلشوولر و عملي همکارلیک دوام اېتیشینی بیلدیرگن.
امیرخان متقي «مسکو فرمتی»نینگ سکّیزینچی ییغیلیشیده اشتراک اېتیش اوچون روسيه‌گه بارگن. او بوندن آلدین روسيه نینگ باشقه بیر قطار رسميلری، جمله‌دن، مملکت تشقی ایشلر وزیری سېرگېی لاوروف بیلن هم اوچره‌شیب، مذاکره اۉتکزگن.
«مسکو فرمتی» نینگ سکّیزینچی ییغیلیشی کېچه روسيه پایتختیده بۉلیب اۉتدی. ییغیلیش طالبلر و پاکستان اۉرته‌سیده‌گی کېلیشماوچیلیکلر سبب قۉشمه بیانات قبول قیلینمسدن یکونلندی.
