طالبلر تشقی ایشلر وزیری امیرخان متقی مسکوده‌گی «مسکو فرمتی»نینگ سکّیزینچی ییغیلیشی دایره‌سیده چین‌نینگ افغانستان بۉییچه مخصوص وکیلی یوشیائو یونگ بیلن اوچره‌شیب، مذاکره اۉتکزدی.
طالبلر تشقی ایشلر وزیرلیگی بوگون (چهارشنبه، ۱۵-میزان) نشر قیلگن بیاناتیده ایتیلیشیچه، اوچره‌شووده افغانستان و چین اۉرته‌سیده‌گی ایکّی تامانله‌مه مناسبتلر، منطقه‌ده‌گی وضعیت همده اۉزارا همکارلیکنی ینه‌ده رواجلنتیریش مسأله‌لری بحث قیلینگن.
وزیرلیک‌نینگ تأکیدلشیچه، متقی «مسکو فرمتی» ییغیلیشیده چین‌نینگ افغانستانده‌گی طالبلر نظارتیده‌گی وضعیتگه نسبتاً کانتروکتیف و موازنتلی موضوعی اوچون منّتدارلیک بیلدیرگن همده اۉزارا حرمت و عمومي منفعتلر اساسیده ایکّی دولت اۉرته‌سیده‌گی مناسبتلرنی ینه‌ده مستحکملش اوچون شرایط موجودلیگینی ایتگن.
طالبلر تشقی ایشلر وزیرلیگی چین نینگ مخصوص وکیلی ایکّی مملکت و طالبلر اۉرته‌سیده‌گی مناسبتلرنی «ایجابي» دېب بهاله‌گنینی، شونینگدېک، چین‌نینگ منطقه‌ده‌گی وضعیتگه عاید قره‌شلرینی بیلدیرگنینی یازگن.
وزیرلیک‌نینگ ایتیشیچه، او منطقوي برقرارلیک، اۉزارا همکارلیک همده افغانستان‌نینگ اقتصادي و منطقوي علاقه‌لرینی رواجلنتیریش یۉلیده بیرگه‌لیکده‌گی سعی-حرکتلر نینگ مهم‌لیگیگه اورغو بېرگن.
چین‌نینگ مخصوص وکیلی حاضرچه طالبلر تشقی ایشلر وزیری بیلن اوچره‌شووی یوزه‌سیدن ایضاح بېرمه‌گن.
سۉنگگی بېش ییل دوامیده طالبلر و چین اۉرته‌سیده سیاسي و اقتصادي علاقه‌لر یقین بۉلیب کېلگن. شونگه قره‌مه‌ی، پکین حلی هم افغانستانده‌گی طالبلر حکومتینی رسماً تن آلمه‌گن.
