«افغانستان آزادلیک‌جبهه‌سی» بوگون (چهارشنبه، ۱۵-میزان) بدخشان ولایتی‌نینگ مرکزی فیض اباد شهریده اېرته‌لب صادر بۉلگن پارتلش اوچون جوابگرلیکنی اۉز ذمّه‌سیگه آلدی.
اوشبو جبهه بیاناتیده ایتیلیشیچه، بوگون اېرته‌لب ساعت ۸:۳۰ لر اطرافیده فیض اباد نینگ «شهر نو» حدودیده طالبانگه تېگیشلی «هایلکس» روسوملی موتر هجومگه اوچره‌گن. نتیجه‌ده طالبلرنینگ تۉرت اعضاسی، جمله‌دن، گروه نینگ بیر قوماندانی هلاک بۉلگن.
بوندن اوّل طالبلرنینگ بدخشان ولایتی پولیس قوماندانلیگی پارتلش صادر بۉلگنینی تصدیقلب، فیض‌اباد ینگی شهری نینگ «هنگر» حدودیده «کرولا» روسوملی موتر نشانگه آلینگنی و بو نینگ عاقبتیده ایکّی نفر تینچ اهالی یېنگیل جراحتلنگنینی بیلدیرگن اېدی.
طالبلرنینگ بدخشان ولایتی پولیس قوماندانلیگی مطبوعات سوزلاوچیسی احسان‌الله کامگار اوشبو موتر یۉلاوچیلری تینچ اهالی بۉلگنینی ایتگن.
اونینگ قۉشیمچه قیلیشیچه، پارتلش بیلن باغلیق حالده تۉرت نفر گماندار حبسگه آلینگن.
«افغانستان آزادلیک جبهه‌سی» هجومدن سۉنگ «طالبلر سراسیمه و قۉرقوو بیلن تینچ اهالینی حبسگه آلیب، اولرگه نسبتاً تضییق و زۉرآورلیک قیلگن همده قۉرقوو محیطینی یره‌تیب، عادي اهالیگه نسبتاً زۉرآورلرچه مناسبتده بۉلگن»، دېب بیلدیرگن.
افغانستان نینگ شِمالی-شرقیده جایلشگن بدخشان ولایتیده سۉنگگی پیتلرده طالبلرگه قرشی قوراللی گروهلر نینگ هجوملری کۉپه‌یگن. فیض‌اباد شهریده شو هفته باشیده هم پارتلش صادر بۉلیب، اونده طالبلر استخباراتی‌نینگ بیر اعضاسی هلاک بۉلگن اېدی. اوشبو پورتلش اوچون بیر وقت نینگ اۉزیده ایشید و «افغانستان ملي قرشیلیک فرونت جبهه‌سی» جوابگرلیکنی اۉز ذمّه‌سیگه آلگن.
