منبعلر «اطلاعات روز» گزیته‌سیگه معلوم قیلیشیچه، طالبلر «امید سبز» شهرچه‌سیده اجاره‌ده یشاوچی عایله‌لرگه «هر بیر خانه اوچون ۴مینگ افغاني» اجاره حقی تۉله‌شنی ایتگن.
بیر منبع‌نینگ ایتیشیچه، طالبلرنینگ کۉرسه‌تمسیگه کۉره، اجاره‌چیلر جاري ییل باشیدن باشلب هر بیر خانه اوچون ۴ مینگ افغاني اجاره تۉله‌شی و کېلگوسی آلتی آیلیک اجاره حقینی هم آلدیندن تۉله‌شی کېره‌ک.
منبعگه کۉره، بو حالت طالبلر اوشبو شهرچه‌ده اۉز اعضالری و کوچلری اوچون هر بیر خانه نینگ اجاره حقینی ۱ مینگ افغاني قیلیب بېلگیله‌گن بیر پیتده یوز بېرماقده.
منبع‌نینگ تأکیدلشیچه، طالبلرنینگ مقصدی آدملرنی اویلرینی بۉشه‌تیشگه مجبور قیلیش و بو شهرچه‌گه اۉز کوچلری همده اعضالرینی جایلشتیریشدیر.
طالبلر عدلیه وزیرلیگی اوّلراق «امید سبز» شهرچه‌سیده اجاره‌ده یشاوچی عایله‌لرگه بوندن بویان اجاره حقینی اوی اېگه‌لریگه تۉله‌مسلیک، بلکه اوشبو وزیرلیک حسابیگه اۉتکزیشنی بویورگن اېدی.
منبعلر، شونینگدېک، «اطلاعات روز» گزیته‌سیگه طالبان «امید سبز» شهرچه‌سی اهالیسی‌نینگ «ملکچیلیک حجتلری» نسخه‌لرینی ییغایاتگنینی ایتگن.
بیر منبع نینگ ایتیشیچه، طالبلر خادملری بوگون (چارشنبه، ۱۵ میزان) «امیدسبز» شهرچه‌سی‌نینگ «۴-فاز»سیده اهالی‌نینگ ملکچیلیک حجتلری نسخه‌لرینی ییغایاتگن بۉلگن.
منبعگه کۉره، طالبلر عدلیه وزیرلیگی‌نینگ «یېرلرنی باسیب آلیش نینگ آلدینی آلیش کمیسیونی»دن عبارت تۉرت کیشیلیک گروه بیر نېچه قوراللنگن شخص بیلن بیرگه اوشبو حجتلرنی ییغماقده.
منبعلر، شونینگدېک، طالبلر خادملری شهرچه‌ده‌گی بۉش اویلرنی «مُهرلب قۉیه‌یاتگنی» و اوی اېگه‌لریگه اولرنی قَیته آچیشگه رخصت بېرمه‌یاتگنینی اَیتماقده.
طالبلر عدلیه وزیرلیگی «امید سبز» شهرچه‌سینی «دولت ملکی» دېب اعلان قیلگن و اونینگ اهالیسیگه او یېردن کۉچیب چیقیش حقیده بویروق بېرگن.
«امیدسبز شهرچه‌سی» کابل‌نینگ غربیده جایلشگن بۉلیب، اونینگ اهالیسی اساسن هزاره‌لردن عبارت. اوشبو شهرچه سۉنگگی ییگیرمه ییل دوامیده قوریلگن. افغانستان سابق جمهور رئیس اۉرین‌باسری محمد کریم خلیلي نینگ اوکه‌سی محمد نبی خلیلي اونینگ اساسي اوچ سهمدارلریدن بیریدیر.
محمد نبی خلیلي «امیدسبز شهرچه‌سی عملده‌گی شرعي حجتلر، رسمي ملکچیلیک حجتلری، وکالتلی اداره‌لر تامانیدن تۉلیق تېکشیروودن اۉتگنلیگی و قانوني قوریلیش رخصتی اساسیده برپا اېتیلگن»، دېگن.
محمد نبی خلیلي‌نینگ ایتیشیچه، امیدسبز شهرچه‌سیده‌گی برچه یېرلر «موجود حجتلرگه کۉره، ییللر و اولادلر دوامیده اوشبو یېرلرگه اېگه‌لیک قیلیب کېلگن، عملده‌گی حجتلرگه اېگه بۉلگن و سالیقلرنی تۉله‌ش تاریخی اۉنلب ییللرگه باریب تقه‌له‌دیگن» ملکدارلردن ساتیب آلینگن.
«امیدسبز» شهرچه‌سی نینگ «دولت ملکی» دېب اعلان قیلینیشی کېنگ ناراضیلیکلرگه سبب بۉلگن. کۉپچیلیک بونی طالبلرنینگ هزاره‌لر و شیعه‌لرگه قرشی «کمسیتووچی سیاستی» نینگ دوامی دېب بهاله‌گن.
