بیرلشگن ملتلر تشکیلاتی‌نینگ انسان‌پرورلیک یاردملرنی موافقلشتیریش اداره‌سی (اوچا) مبلغ یېتیشمسلیگی و طالبلرنینگ چېکلاولری افغانستانده‌گی تعلیم تیزیمینی بخرانگه آلیب کېلگنینی، بوندن اېسه قیزلر ینه-ده کۉپراق اذیت چېکه‌یاتگنینی ایتدی.
اوچانینگ افغانستانده‌گی نماینده‌لیگی بوگون (پنج‌شنبه، ۱۶-میزان) نشر قیلگن گزارشیده مملکتده‌گی تعلیم اوچون ضرور بۉلگن ۱۶۰ میلیون دالرلیک مبلغ نینگ اتیگی ۲۲میلیون دالری، یعنی ۱۴ فایزدن کمی تأمینلنگنینی معلوم قیلدی.
اوچا شونده‌ی دېیدی: «افغانستان تعلیم تیزیمیگه اۉقیتووچیلر، مناسب صنفخانه‌لر و ضرور منبعلر کېره‌ک. قیزلر اوچون اېسه بو بحران ینه-ده آغیرراق، چونکه باشلنغیچ تعلیمدن یوقاری باسقیچلرده تعلیم آلیشگه قۉییلگن تعقیق هنوز دوام اېتماقده.»
اوشبو تشکیلات «مبلغلرنی زودلیک بیلن تأمینلش و قیزلرنینگ تعلیم آلیشیگه قۉییلگن تعقیقنی بېکار قیلیشنی کېچیکتیریب بۉلمه‌یدی»، دېیه تأکیدله‌گن.
اوچا نماینده‌سی اولگا چرفکو هلمند ولایتی‌نینگ مرکزی لشکرگاه شهریده‌گی مکتبلردن بیریگه تشریفی چاغیده افغانستان قیزلری تعلیم ساحه‌سیده ینه-ده آغیر بخراندن اذیت چېکه‌یاتگنینی ایتگن.
او شونده‌ی دېیدی: «دنیانینگ هر بیر جاییده اۉقووچیلر تعلیم آله‌دیگن، اۉقیتووچیلر درس بېره‌دیگن و آته-آنه‌لر فرزندلری نینگ کېله‌جگیگه سرمایه کیریته‌دیگن مکتبلر موجود. اما افغانستان‌ده مبلغ یېتیشمسلیگی، مکتبلر و اېنگ مهمی، اۉقیتووچیلر یېتیشمسلیگی سببلی تعلیم جدّي چېکلنگن. بوندن تشقری، باشلنغیچ تعلیمدن یوقاری باسقیچلرده قیزلر اوچون مکتب اېشیکلری هنوز یاپیق.»
اولگا چرفکونینگ ایتیشیچه، بو چېکلاولرنینگ برچه‌سی صنفخانه‌لر بیلن چېکلنیب قالمه‌یدی. چونکه تعلیم آلیش امکانیتلری‌نینگ کمه‌ییشی محنت بازاریگه ینگی ایشچی کوچی‌نینگ کیریب کېلیشی اوچون امکانیتلرنینگ هم قیسقریشینی انگله‌ته‌دی.
اونینگ قۉشیمچه قیلیشیچه، عیاللر اشتراکی ضرور بۉلگن ساغلیقنی سقلش و تعلیم کبی ساحه‌لر طالبلرنینگ چېکلاولری همده مبلغ یېتیشمسلیگیدن کۉپراق ضرر کۉرماقده.
اونینگ تأکیدلشیچه، تعلیم فقط بیلیم آلیش مسأله‌سی اېمس، بلکه کېله‌جککه و جمعیت‌نینگ عمومي رواجیگه سرمایه کیریتیش مسأله‌سیدیر. اوشبو ساحه‌ده‌گی عملده‌گی چېکلاولر اېسه بوتون جمعیت‌نینگ اذیت چېکیشیگه سبب بۉلماقده.
سۉنگگی بېش ییل دوامیده طالبلر عیاللر و قیزلرنینگ مکتب‌نینگ آلتینچی صنفیدن یوقاری باسقیچلرده تعلیم آلیشیگه تعقیق قۉیگنیدن بېری، بیرلشگن ملتلر تشکیلاتی‌نینگ حساباتیگه کۉره، قریب ۲.۶ میلیون قیز تعلیم آلیش امکانیتیدن محروم بۉلگن.
بیرلشگن ملتلر تشکیلاتی‌نینگ ایتیشیچه، طالبلر ۷مینگ نفر عیال اۉقیتووچینی ایشدن بۉشه‌تگن. نتیجه‌ده عیال اۉقیتووچیلر سانی ۲۰۲۲-ییلده‌گی ۷۳ مینگ نفردن ۲۰۲۴-ییلده ۶۶ مینگ نفرگچه کمه‌یگن.
بیرلشگن ملتلر تشکیلاتی‌نینگ پراگنازیگه کۉره، عملده‌گی چېکلاولر دوام اېتسه، وضعیت ینه‌ده یامانلشه‌دی. افغانستان ۲۰۳۰-ییلگچه قریب ۲۰ مینگ عیال اۉقیتووچیسینی یۉقاتیشی ممکن و نتیجه‌ده مملکتده اتیگی ۴۶ مینگ نفر عیال اۉقیتووچی قالیشی احتمالی بار.
