افغانستان‌نینگ بیرلشگن ملتلر تشکیلاتیدهگی نمایده‌لیگی سرپرستی نصیر احمد فایق خلق‌ارا همجعیتنی طالبلرنینگ خطی-حرکتلریگه نسبتاً فقط قاره‌لش بیلن چېکلنیب قالمسدن، بو گروهگه قرشی موجود برچه واسطه‌لردن فایده‌لنیشگه چقیردی.
او بیرلشگن ملتلر تشکیلاتی‌نینگ عمومی ییغیلیشی‌نینگ ۸۱- ییغینی اوچینچی کمیته‌سیده «انسان حقوقلرینی ایلگری سوریش و حمایه قیلیش» موضوعسیده سۉزله‌گن نطقیده، سۉنگگی بېش ییل دوامیده طالبلر افغانستانده «قصداً آلیب باریلگن سیاست، کمسیتیش و منبعلرنی نهادیلشگن حالگه کېلتیرگنینی» ایتدی.
فایق نینگ تأکیدلشیچه، افغانستان عیاللری و قیزلری جنسی آپارتاید تیزیمیگه دوچ کېلماقده. بو تیزیم اولرنی تعلیم آلیش، ایشلش، اېرکین حرکتلنیش و جماعت حیاتیده اشتراک اېتیش حقوقیدن محروم قیلماقده.
اونینگ قۉشیمچه قیلیشیچه، «طالبلرنینگ سیاستی اسلام نینگ حقیقي تعلیماتلرینی عکس اېتتیرمه‌یدی و افغانستان مدنیتی قدریتلریگه هم ماس کېلمه‌یدی».
افغانستان‌نینگ بیرلشگن ملتلر تشکیلاتیدهگی نماینده‌سی، شونینگدېک، ژورنالیستلر و انسان حقوقلری حمایه‌چیلری قۉرقیتیش همده اۉزباشیمچه‌لیک بیلن حبسگه آلیشلرگه دوچ کېله‌یاتگنینی ایتدی. اونینگ سۉزلریگه کۉره، طالبلر تامانیدن اعلان قیلینگن عمومي عفوگه قره‌مه‌ی، سابق دولت عملدارلری و سابق خوفسیزلیک کوچلری خادملری همان قاتللیک، قییناقلر و مجبوري غایب بۉلیشلرگه دوچ کېلماقده.
فایق‌نینگ ایتیشیچه، اېتنیک و دیني آزچیلیکلر، جمله‌دن، هزاره‌لر و شیعه جماعه‌لری هم کمسیتیش، خوفسیزلیک معمالری و مجبوري کۉچیریلیشگه دوچ کېلماقده.
شو بیلن بیرگه، افغانستان‌نینگ بیرلشگن ملتلر تشکیلاتیدهگی وکیلی خلق‌ارا همجعیتنی موجود برچه واسطه‌لردن فایده‌لنیب، طالباننی کمسیتووچی فرمانلرنی بېکار قیلیشگه، قییناقلر و قصاصکارانه چاره‌لرنی توخته‌تیشگه همده اساسي اېرکینلیکلرنی تیکلشگه مجبور قیلیشی کېره‌کلیگینی تأکیدله‌دی.
فایق جوابگرلیکنی تأمینلش جریانینی دوام اېتتیریش مهم‌لیگینی تأکیدلب، خلق‌ارا جنایي محکمه‌نینگ طالبان رهبری و اوچ نفر وزیریگه نسبتاً حبسگه آلیش اۉردرلرینی اعلان قیلگنی حقیده‌گی یقینده‌گی قرارینی آلقیشله‌دی. او برچه تامانلرنی اوشبو محکمه بیلن تۉلیق همکارلیک قیلیشگه چقیردی.
افغانستان‌نینگ بیرلشگن ملتلر تشکیلاتیدهگی وکیلی، شونینگدېک، افغانستان بۉییچه مستقل تېرگاو میکانیزمی اوچون یېترلی مبلغ اجره‌تیشنی و جنسی آپارتاید انسانیتگه قرشی جنایت صفتیده جنایيلشتیریشنی قۉللب-قوّتلشنی سۉردی. او جزاسیزلیک دایمي روشده بۉیسونمسلیک اوچون مکافاتگه ایلنمسلیگی کېره‌کلیگینی ایتدی.
فایق نینگ قۉشیمچه قیلیشیچه، طالبان بیلن ملاقات عادتي حالگه ایلنمسلیگی کېره‌ک و بونده‌ی ملاقات انسان حقوقلری ساحه‌سیده‌گی اۉلچه‌ب بۉله‌دیگن همده مستقل روشده تېکشیریله‌دیگن یخشیلنیشلرگه باغلیق بۉلیشی لازم.
اونینگ سۉزلریگه کۉره، بو ملاقات افغانلر باشچیلیگیده‌گی سیاسي جریاننی قۉللب-قوّتلشی، اونده عیاللر، فقرالیک جمعیتی، دېموکرا‌تیک کوچلر و باشقه نفوذلی افغان تامانلری اشتراک اېتیشی همده مملکتنی قانوني، اینکلیوزیو و حسابدار باشقروو سری یۉنه‌لتیریشی کېره‌ک.
فایق نینگ تأکیدلشیچه، افغان خلقیدن طالبلر بیلن ملاقات عوضیگه اۉز حقوقلریدن واز کېچیش طلب قیلینمسلیگی کېره‌ک. افغانستان خلقی عدالت، قدر-قیمت و مملکت کېله‌جگینی بېلگیلشده مضمونلی آوازگه اېگه بۉلیشگه لایق.
افغانستان‌نینگ بیرلشگن ملتلر تشکیلاتیدهگی وکیلی، طالبلرنینگ حدود اوستیدن نظارت اۉرنه‌تگنی بو گروهگه قانونيلیک یاکه افغانستان کېله‌جگینی بېلگیلش حقوقینی بېرمسلیگینی ایتدی.
