امریکا کېله‌سی آی بۉلیب اۉته‌دیگن آره‌لیق سیلاولردن آلدین ایرانگه قرشی ینگی هجوملر اویوشتیریشی ممکنلیگی حقیده‌گی خبرلر ترقه‌لگچ، نفت نرخی بېش فایزدن کۉپراققه آشدی.
فرانس پرس اخبارات آژانسی خبریگه کۉره، شمالي دېنگیز برېنت نفتی (نفت نرخی نینگ خلق‌ارا کۉرسه‌تکیچی) پنج‌شنبه کونی (۱۶-میزان) بیر بررېلی اوچون ۱۰۵.۴۸ دالرگه یېتدی..
«آتلانتیک» ژونالی خبر بېریشیچه، آق اوی امریکا اوروش وزیرلیگیدن کانگرس نینگ ۳-نوامبر کونی بۉلیب اۉته‌دیگن آره‌لیق سیلاولریدن آلدین ایرانده‌گی نشانلرگه هجوم قیلیش وریانتلرینی تیارلشنی سۉره‌گن. بو اېسه نفت تأمیناتیده ینه‌ده کتّه اوزیلیشلر یوز بېریشی خوفینی آشیرماقده.
نفت نرخی‌نینگ آشیشی اکسیه‌لر بازاریگه هم تأثیر کۉرسه‌تدی و وال استریت‌نینگ اساسي ایندېکسلری سودالر باشیده په‌سه‌یدی.
اروپاده فرانکفورت و پریج بازارلری ایکّله‌سی هم په‌سه‌یدی، بیراق لندن بازاری ۰.۲ فایزگه آشدی. بونگه نفت نرخی‌نینگ کۉتریلیشی ییریک اېنيرگېتیکه کمپنیلریگه فایده کېلتیرگنی سبب بۉلدی. سودالرنینگ توشدن کېینگی قِسمیده «بپ» اکسیه‌لری ۳.۳ فایزگه، «شېلل» اکسیه‌لری اېسه ۳.۲ فایزگه آشدی.
آسیانینگ ییریک اکسیه‌لر بازارلری هم چهارشنبه کونی وال استریتده‌گی په‌سه‌ییشلرگه اېرگشدی. او یېرده تکنالوژي کمپنیلری سۉنگگی وقتلرده‌گی اۉسیشی‌نینگ بیر قِسمینی بای بېردی.
ایرانگه قرشی ینگی هجوملر احتمالی یقین شرقده‌گی تۉقنه‌شوولر کوچه‌ییب باره‌یاتگن بیر پیتده یوزه‌گه کېلماقده.
یمن حوثيلری پنج‌شنبه کونی ریاض اېر‌پورتینی راکت بیلن نشانگه آلدی و سعوديه عربستانیده‌گی نفت تاسیسات خادملرینی نشانگه آلینمسلیک اوچون اوشبو اۉبژېکتلرنی ترک اېتیشگه چقیردی.
امریکا و ایران اۉرته‌سیده‌گی ماجرا‌نینگ کوچه‌ییشی ترامپگه ینه‌ده کتّه باسیم اۉتکزیشی ممکن. بو اونینگ باشچیلیگیده‌گی جمهوریت‌چیلر کانگرس نینگ هر ایکّی پله‌ته‌سیده هم کۉپچیلیکنی بای بېریش خوفی آستیده تورگن بیر پیتگه تۉغری کېلماقده.
ترامپ اوّلراق ایران آره‌لیق سیلاولرگه تأثیر کۉرسه‌تیش مسأله‌سیده کېلیشووگه راضی بۉلمسلیگینی، بونده‌ی کېلیشوو سیلاولردن کېین عملگه آشیشی ممکنلیگینی ایتگن اېدی.
ایران یقینده ماجرانی توگه‌تیش و هرمز بۉغازینی قَیته آچیش اوچون یېتّی کونلیک رېجه تکلیف قیلگنینی اَیتماقده. بیراق ترامپ بو رېجه‌نی رد اېتگن.
