امریکا قوشمه ایالتلری تشقی ایشلر وزیرلیگی آدم سوداسی بۉییچه ینگی حساباتیده طالبلر باشقروویده‌گی افغانستانده «بچه‌بازلیک» رسماً تعقیقلنگنیگه قره‌مه‌ی، بو حادثه هنوز دوام اېته‌یاتگنینی معلوم قیلدی.
گزارش کۉره، کوزه‌تووچیلر اَیریم حاللرده «طالبلر اعضالری‌نینگ اۉزلری بچه‌بازلیک بیلن شغللنگنینی» بیلدیرگن.
امریکا تشقی ایشلر وزیرلیگی اۉز حساباتیده «بچه‌بازلیک»نی طالبلر باشقروویده‌گی افغانستانده «جنسي قوللیک» نینگ بیر کۉرینیشی صفتیده بهاله‌گن و حسابات دوریده بو عملیات نینگ معین شکلی موجود بۉلگنینی قید اېتگن.
امریکا قوشمه ایالتلری تشقی ایشلر وزیرلیگی گزارشیده طالبلر صفیده باله‌لرنی یاللش هم دوام اېته‌یاتگنی، اوشبو گروه باله‌لردن جنگاور و یاردمچی وظیفه‌لرده فایده‌لنه‌یاتگنی ایتیلگن.
امریکا تشقی ایشلر وزیرلیگی نینگ یازیشیچه، کوزه‌تووچیلر محلي طالبلر اعضالری باله‌لرنینگ توغیلگنلیک حقیده‌گی حجتلریده یاشینی ساخته‌لشتیریب، اولرنی اۉز صفلریگه یالله‌یاتگنی حقیده خبر بېرگن.
امریکا تشقی ایشلر وزیرلیگی گزارشیگه کۉره، طالبلر نظارتیده‌گی اداره‌لر آدم سوداسی بیلن شغللنووچیلرنی جنایي جوابگرلیککه تارتیش اوچون هېچ قنده‌ی جدّي چاره کۉرمه‌گن. شونینگدېک، اوشبو گروه آدم سوداسیگه قرشی قانوننی عملگه آشیریش باره‌سیده هم هېچ قنده‌ی چاره کۉرمه‌گن.
امریکا تشقی ایشلر وزیرلیگی‌نینگ تأکیدلشیچه، طالبلر آدم سوداسی بیلن باغلیق تېرگاولر، سود تعقیبلری یاکه چیقریلگن حکملر حقیده هېچ قنده‌ی معلومات تقدیم اېتمه‌گن. شونینگدېک، آدم سوداسی قربانلرینی انیقله‌مه‌گن و اولرگه یاردم هم کۉرسه‌تمه‌گن.
وزیرلیک‌نینگ قۉشیمچه قیلیشیچه، طالبلر عیاللر، آزچیلیک گروهلری اعضالری و آدم سوداسیگه نسبتاً ضعیف بۉلگن باشقه قتلملرنینگ حقوقلرینی هم چېکله‌گن. بوندن تشقری، نادولت تشکیلاتلر فعالیتیگه تۉسیقلر یره‌تیب، قربانلرگه یاردم کۉرسه‌تیلیشیگه خلل بېرگن.
امریکا تشقی ایشلر وزیرلیگی شونگه قره‌مه‌ی، طالبلر افغانستانده آدم سوداسیگه قرشی اَیریم چاره‌لرنی کۉرگنینی بیلدیردی.
وزیرلیک نینگ قید اېتیشیچه، طالبان آدم سوداسی بیلن مهاجرلرنی ناقانوني آلیب اۉتیش اۉرته‌سیده هم فرق قۉیمه‌یاتگنگه اۉخشه‌یدی.
امریکا تشقی ایشلر وزیرلیگی اۉز حساباتیده افغانستانده‌گی آدم سوداسی کۉلمینی «کېنگ» دېب تعریفله‌گن. حساباتده آدم سوداگرلری مملکت ایچیده‌گی و خارجدن آلیب کېلینگن قربانلرنی افغانستانده استثمار قیلیشی، شونینگدېک، افغانستانلیک قربانلردن خارجده هم فایده‌لنیشی ایتیلگن.
امریکا تشقی ایشلر وزیرلیگی حساباتیگه کۉره، افغانستانده ایچکی آدم سوداسی تره‌نسچېگره‌وي آدم سوداسیگه قره‌گنده کېنگراق ترقه‌لگن.
حساباتده ایتیلیشیچه، آدم سوداگرلری اېرککلر، عیاللر و باله‌لرنی قرضلری سببلی مجبوري محنتگه جلب قیله‌دی. بونده‌ی محنت تورلریگه خشت پیشیریش، مجبوري اوی محنتی و قالین تا‘قیش کیره‌دی.
حساباتگه کۉره، عیاللر و قیزلر نینگ حرکتلنیش اېرکینلیگی همده حقوقلریگه قۉییلگن چېکلاولر، شونینگدېک، اولر نینگ ایش و تعلیم آلیش امکانیتلری کېسکین کمه‌یگنی استثمار خوفینی سېزیلرلی درجه‌ده آشیرگن.
گزارش‌ده، شونینگدېک، طالباندن یشیرینه‌یاتگن یاکه اوشبو گروهدن قاچگن افغانستان نینگ سابق حربي خدمتچیلری مالیوي بې‌قرارلیک و خوفسیزلیک تهدیدلری طفیلی روسيه و اوکراین اۉرته‌سیده‌گی اوروشگه جلب قیلینیش خوفی آستیده قاله‌یاتگنی قید اېتیلگن.
طالبلر افغانستانده آدم سوداسی و «بچه‌بازلیک»نی تعقیقله‌گن. اوشبو گروه اَیریم حاللرده «آدم سوداسی»ده عیبلنگن شخصلرنی حبسگه آلگنینی هم معلوم قیلگن.
