طالبلرنینگ نورستان ولایتیده‌گی کانلر و پترولیم ریاستی اوشبو ولایت کانلریدن قزیب آلینگن ۳۱ کیلوگرام قیمت‌بها و یریم قیمت‌بها تاشلر ۴ میلیون ۴۱۵ مینگ افغانيگه ساتیلگنینی معلوم قیلدی.
نورستانده‌گی طالبلر کانلر و پترولیم ریاستی باشلیغی سید رحیم عمیرنینگ ایتیشیچه، اوشبو مقدارده‌گی قیمت‌بها و یریم قیمت‌بها تاشلر بوگون (جمعه، ۱۷ـ میزان) کیم آشدی آرقه‌لی ساتیلگن.
اونینگ قۉشیمچه قیلیشیچه، اوشبو تاشلر بېروج، زمرد، «دگره» و «چوره»دن عبارت بۉلیب، نورگرام تومنیده‌گی کانلردن قزیب آلینگن.
نورستانده‌گی طالبلر کانلر و پترولیم اداره‌‌سی باشلیغی اوشبو تاشلر سوداسیدن توشگن مبلغ نینگ ۴۲۱ مینگ ۵۰۰ افغانيسی گروه خزینه‌سیگه اۉتکزیلیشینی ایتگن.
طالبلر افغانستانده قَیته حاکمیتنی اېگه‌لله‌گنیدن بویان مملکت بۉیلب کانلرنی کېنگ مقیاسده قزیب آلیشنی باشله‌گن و اولرنینگ محصولاتلرینی ساتیش آرقه‌لی اۉز حکومتی خرجتلری نینگ بیر قِسمینی قاپله‌ماقده.
شو بیلن بیرگه، طالبلر تامانیدن مملکت کانلرینی قزیب آلیش و اولرنینگ محصولاتلرینی ساتیش کېنگ کۉلملی تنقیدلرگه هم سبب بۉلماقده. اَیریم سیاسي گروهلر طالباننی مملکت طبيعي بایلیکلرینی «تالان-تاراج قیلیش»ده عیبلب کېلماقده.
