شمالي بېش ولایتده طالبلر واليلری، امنیه قوماندانلری و استخبارات مسووللری خوفسیزلیک ییغیلیشی اۉتکزدیلر.
طالبلر ایچکی ایشلر وزیرلیگی بوگون (شنبه، ۱۷میزان) ترقه‌تگن بیاناتیده اوشبو ییغیلیش فاریاب ولایتیده اۉتکزیلگنینی معلوم قیلدی.
بیاناتگه کۉره، ییغیلیشده بلخ، فاریاب، جوزجان، سرپل و سمنگان ولایتلری‌نینگ واليلری، خوفسیزلیک قوماندانلری و استخبارات مسووللری، شونینگدېک، ۲۰۹ -«الفتح» قول اردو قوماندانی اۉرین‌باسری همده طالبلرنینگ شمالي زون‌ده‌گی حربي محکمه‌لری نماینده‌لری اشتراک اېتگن.
ییغیلیش طالبلرنینگ بلخده‌گی واليی محمد یوسف وفا نینگ رهبرلیگیده اۉتکزیلگن.
طالبلر توزیلمه‌سیده علیحده وکالتلرگه اېگه واليلردن بیری حسابلنگن یوسف وفا شِمالده‌گی طالبلر مسووللری اۉرته‌سیده موافقلشتیریش و معلومات المشیشنی کوچه‌یتیریشگه اورغو بېرگن.
طالبلر ایچکی ایشلر وزیرلیگی معلوماتیگه کۉره، محمد یوسف وفا «دولت اداره‌لری اۉرته‌سیده‌گی همکارلیکنی کوچه‌یتیریش، خوفسیزلیکنی تأمینلش و مسووللر اۉرته‌سیده معلومات المشیش» ضرورلیگینی تأکیدله‌گن.
وزیرلیک قۉشیمچه قیلیشیچه، اشتراکچیلر «خوفسیزلیک حالتی، جنایتچیلیک حادثه‌لری، چېگره‌داش تومنلر اۉرته‌سیده‌گی همکارلیکنی کوچه‌یتیریش، دولت اداره‌لرینی اصلاح قیلیش، جماعتچیلیکنی خبردار قیلیش دستورلری و اهالی اوچون ایش امکانیتلرینی یره‌تیش» کبی مسأله‌لرنی محاکمه قیلگنلر.
شِمالده‌گی طالبلرنینگ اداری و حربي مسووللری هر بیر ولایتده گروه مسووللری اوچون بیر کونلیک «اصلاحات سمینارلری» اۉتکزیشگه قرار قیلگنلر.
شونینگدېک، طالبلذشمالي حدودده‌گی ۲۰۰ نفر دیني علما بیلن مصلحتلشوو اوچره‌شوولرینی تشکیل اېتیشگه قرار قیلگن.
بیاناتده ایتیلیشیچه، طالبان مسووللری اتوموبیل یۉللری و شهرلر ایچیده‌گی حربي پُستلرنی کوچه‌یتیریش و اولرنی ستندردلشتیریشگه هم قرار قیلگنلر.
