طالبانلرنینگ عدلیه وزیرلیگی بلخ ولایتیده‌گی «حاجی عبدالباقي و حاجی اسماعیل فارمسی» دېب اته‌لووچی منطقه‌نینگ قریب ۲۵۰ جریب یېر میدانی «دولت ملکی» دېب بېلگیلنگنینی معلوم قیلدی.
طالبلرنینگ عدلیه وزیرلیگی بوگون (شنبه، ۱۸ میزان) نشر قیلگن بیاناتیده ایتیلیشیچه، اوشبو یېر بلخ ولایتی‌نینگ مرکزی مزار شریف شهری نینگ ۸-ناحیه‌سیده جایلشگن.
وزیرلیک معلوماتیگه کۉره، شمالي زون‌ده‌گی باسیب آلینگن یېرلر بیلن باغلیق ایشلرنی کۉریب چیقووچی مخصوص محکمه «حاجی عبدالباقي و حاجی اسماعیل فارمسی» یېرلرینی اېگه‌للب تورگن شخصلرنینگ حجت و دلیللرینی سینچیکلب کۉریب چیققن. محکمه قراریگه کۉره، عمومي میدانی ۲۵۰ جریب بۉلگن اوشبو یېرلر نینگ برچه‌سی دولت ملکی حسابلنه‌دی. یېرلرنی اېگه‌للب تورگن شخصلر اېسه اولرنی یېرلرنی باسیب آلیش نینگ آلدینی آلیش و باسیب آلینگن یېرلرنی قَیتریش کمیسیونیگه تاپشیریشگه مجبور.
طالبلرنینگ عدلیه وزیرلیگی مملکت بۉیلب دولتگه قره‌شلی باسیب آلینگن یېرلرنی تېکشیریش، دولت ملکی صفتیده بېلگیلش و قَیتریش جریانی جدل دوام اېته‌یاتگنینی بیلدیردی.
وزیرلیک‌نینگ ایتیشیچه، سۉنگگی تۉرت ییل دوامیده ۱۴ ولایتده ۴۹ ته تورر جای شهرچه‌سی تۉلیق یاکه قسماً «دولت ملکی» دېب بېلگیلنگن.
اوشبو شهرچه‌لر نینگ اَیریملری اهالی یشه‌یدیگن حدودلر بۉلیب، طالبلر اولرنینگ اهالیسیگه اوی-جایلرنی بۉشه‌تیش و اجاره حقی تۉلش حقیده کۉرسه‌تمه بېرگن.
