افغانستان عیاللری اوچون «ساله» یېتکچیلیک مکتبی باشلیغی شبانه بسیج راسخ، آکسفورد بیلیم یورتی‌نینگ همکار تشکیلاتلریدن بیری بۉلگن «وایدنفلد-هافمن ترست» بیلن همکارلیکده افغانستانلیک عیاللر اوچون تعلیم تحصیلی بورسیه‌نی تشکیل اېتیشگه ۲.۵میلیون دالر اجره‌تیلگنینی معلوم قیلدی. اوشبو بورسیه آرقه‌لی هر ییلی کمیده بیر نفر افغانستانلیک عیال آکسفورد بیلیم یورتیده ماسترلیک باسقیچیده تحصیل آلیشی ممکن.
راسخ خانیم بوگون (شنبه، ۱۸ میزان) ایکس‌ده‌گی صحیفه‌سیده یازیشیچه، او اوشبو بورسیه‌نی «افغانستان عیاللری یېتکچیلیگی جمغرمه‌سی» دېب نامله‌گن. بورسیه طلبلرگه جواب بېره‌دیگن ماسترلیک یۉنه‌لیشیده اۉقیش اوچون برچه تعلیم خرجتلرینی قاپله‌یدی.
راسخ خانیم نینگ ایتیشیچه، بوندن تشقری، آزیق-طعام و تورر جای خرجتلرینی قاپلش اوچون ییللیک نفقه، شونینگدېک، طلبه‌لر نینگ باشقه اَیریم خرجتلری اوچون هم قۉشیمچه مبلغ اجره‌تیله‌دی.
اونینگ قۉشیمچه قیلیشیچه، اوشبو بورسیه صاحبه‌لری«وایدنفلد-هافمن ترست » تامانیدن تشکیل اېتیله‌دیگن یېتکچیلیک کۉنیکمه‌لرینی رواجلنتیریش دستوریده هم اشتراک اېته‌دیلر.
شبانه بسیج راسخ‌نینگ ایتیشیچه، او اۉزی هم آکسفورد یونیورسیتییده «وایدنفلد-هافمن ترست. » تشکیلاتی‌نینگ تحصیلی و یېتکچیلیک تعلیم دستورینی تمامله‌گن. او اوشبو مالیوي یاردم آرقه‌لی افغانستان عیاللری‌نینگ جسارتی و متانتینی اعتراف اېته‌یاتگنینی تأکیدله‌گن.
اوشبو بورسیه آکسفورد بیلیم یورتیده ۲۰۲۷-ییل سپتمبر آییده باشلنه‌دیگن ینگی اۉقوو ییلی اوچون حجت تاپشیره‌دیگن نامزادلر اوچون موجود بۉله‌دی.
راسخ خانیم نینگ تأکیدلشیچه، اوشبو مالیوي یاردم «ساله» مکتبی تامانیدن مالیه‌لشتیریلمه‌یدی و مذکور تشکیلات فعالیتینی قۉللب-قوّتلش اوچون ییغیله‌دیگن مبلغلردن مستقلدیر.
اونینگ توشونتیریشیچه، ۲۰۲۴-ییل بهاریده او بیلل گېیتس نینگ سابق رفیقه‌سی مېلیندا گېیتس تامانیدن خیریه و گومانیتار فعالیتینی باشلش اوچون ۲۰ میلیون دالر آلگن ۱۲ کیشیدن بیری بۉلگن. بیراق او اوشبو بورسیه‌نی عیناً شو مبلغ حسابیدن مالیه‌لشتیریله‌دیمی یاکه یۉقمی، انیق ایتمه‌گن.
عیاللر حقوقلری فعالی شونده‌ی یازگن: «کېله‌سی کوزده افغانستانلیک بیر عیال نینگ حیاتی و یېتکچیلیک یۉلی آکسفورد یونیورسیتییده باشلنه‌دی. کېینگی ییلی اونگه ینه بیر افغانستانلیک عیال قۉشیله‌دی و بو جریان ییلدن-ییلگه، بیر عیالدن باشقه‌سیگه دوام اېته‌دی. بو عیاللر نینگ هر بیری قنده‌ی کېله‌جک یره‌تیشینی کۉریشنی صبرسیزلیک بیلن کوتیه‌پمن.»
اوشبو بورسیه طالبلذ افغانستانده حاکمیتنی قَیته اېگه‌لله‌گنیدن سۉنگ قیزلرنینگ آلتینچی صنفدن یوقاری تعلیم آلیشیگه تعقیق قۉیگن و قریب ۲.۵ میلیون قیزنی مکتب و تعلیمدن محروم قیلگن بیر پیتده تشکیل اېتیلماقده.
شبانه بسیج راسخ کابلده توغیلیب، شو شهرده وایه‌گه یېتگن. طالبان نینگ بیرینچی حکمرانلیگی دوریده قیزلر نینگ تعلیم آلیشی تعقیقلنگنی سببلی او یشیرین مکتبلرده تحصیل آلگن. حاضر اېسه تعلیمدن محروم بۉلگن قیزلر اوچون اۉقیش امکانیتلرینی یره‌تیب کېلماقده.
او آکسفورد بیلیم یورتیده دولت سیاستی یۉنه‌لیشی بۉییچه ماسترلیک درجه‌سینی آلگن. فعالیتی اوچون بیر نېچه نفوذلی مکافاتلرگه، جمله‌دن، ۲۰۲۳-ییلده نشنال جیوگرافیک تامانیدن «ییل تدقیقاتچیسی» مکافاتیگه سزاوار بۉلگن.
