افغانستان‌نینگ سابق جمهور رییسی حامد کرزی «خلق‌ارا قیزلر کونی» مناسبتی بیلن یۉلله‌گن خبریده مملکت‌نینگ ترقیاتی و رواجلنیشی قیزلر تعلیم آلیش امکانیتیگه اېگه بۉلگن تقدیرده‌‌گینه ممکنلیگینی تأکیگدله‌دی.
کرزی بوگون (یک‌شنبه، ۱۹ میزان) ایکس اجتماعي ترماغیده پیام نشر قیلیب، ینه بیر بار مکتب و بیلیم یورتلری‌نینگ اېشیکلرینی قیزلر اوچون آچیشگه چقیردی.
کرزی شونده‌ی یازدی: «خلق‌ارا قیزلر کونی انسانیت جمعیتینی قیزلر آلدیده‌گی آغیر مسوولیتگه اعتبار قره‌تیشگه اونده‌یدی. شو مناسبت بیلن برچه‌دن قیزلرنی اۉغیل باله‌لر قطاری کوچلی و امکانیتلی قیلیش مسأله‌سینی اعتباردن چېتده قالدیرمسلیک سۉره‌له‌دی.»
او قۉشیمچه قیلدی: «افغانستان ترقیات و رواجلنیشگه اېریشیشی اوچون، اېنگ اوّلا، قیزلرنینگ امکانیتلرینی کېنگه‌یتیریشگه اعتبار قره‌تیشی کېره‌ک. بو اېسه قیزلر برچه تعلیم آلیش امکانیتلریدن فایده‌لنیب، یوقاری علمي باسقیچلرنی تماملب، اۉز خلقی و مملکتیگه خدمت قیله آلگن تقدیرده‌‌گینه ممکن.»
سابق جمهور رئیس خلق‌ارا قیزلر کونینی نشانلر اېکن، ینه بیر بار طالبلرنی امکان قدَر تېزراق مکتب و بیلیم یورتلری اېشیکلرینی قیزلر اوچون آچیشگه چقیردی.
حامد کرزی‌نینگ ایتیشیچه، قدیمي مدني تاریخگه اېگه بۉلگن و عیاللر همده قیزلرگه چوقور حرمت بیلن قره‌یدیگن افغانستان خلقی ایچکی و خلق‌ارا منبرلرده اولرنینگ موقعی، موفقیتلری و جسارتلرینی فخر بیلن تیلگه آله‌دی.
بو حالت طالبلر حاکمیتگه قَیتگنیدن سۉنگ، مکتب‌نینگ آلتینچی صنفیدن یوقاری باسقیچلرده عیاللر و قیزلرنینگ تعلیم آلیشینی تعقیقله‌گن بیر پیتده یوز بېرماقده.
طالبلرنینگ «قیزیل یریم آی» رهبری شهاب‌الدین دلاور ایکّی کون اوّل تلویزیون صحبتیده قیزلر تعلیمی‌نینگ تعقیقلنیشینی حمایه قیلیب، «افغانلر عیاللر مسأله‌سیده شو قدَر قتّيق قۉلکی، ییغیلیشلرده عیال نامینی هم تیلگه آلمه‌یدیلر»، دېگن.
