طالبلرنینگ شهرسازلیک و اوی-جای قوریلیشی وزیرلیگی «تمیم انصار» صناعت شهرچه‌سی‌نینگ تاسیسات لایحه‌سی تصدیقلنگنینی معلوم قیلدی.
اوشبو وزیرلیک بوگون (یک‌شنبه، ۱۱-اکتوبر) نشر قیلگن بیاناتیده «تمیم انصار» صناعت شهرچه‌سی کابل ولایتی‌نینگ بگرامی اولسواللیگیگه قره‌شلی «بوت‌خاک» حدودیده برپا اېتیلیشینی بیلدیرگن.
اوشبو صناعت شهرچه‌سی ایکّی باسقیچده، مینگ جریب یېر میدانیده قوریلیشی رېجه‌لشتیریلگن. شهرچه‌ده آزیق-طعام صناعتی، فارماسیون، یېنگیل صناعت و باشقه ساحه‌لرده ایشلب چیقریش همده قَیته ایشلش اوچون ۲۹۹ته صناعت کارخانه‌سی تشکیل اېتیله‌دی. جمله‌دن، قیشلاق خۉجه‌لیگی محصولاتلری و قوروق مېوه‌لرنی قَیته ایشلش کارخانه‌لری هم بۉله‌دی.
صناعت شهرچه‌سی‌نینگ تاسیسات لایحه‌سیده یۉللر قوریش، ایچیملیک سووی بیلن تأمینلش، آقاوه سوولرنی ییغیش و چیقریش ترماقلرینی برپا اېتیش، برق تاسیساتلرینی یره‌تیش همده آقاوه سوولرنی تازه‌لش انشااتینی قوریش رېجه‌لری کۉزده توتیلگن.
طالبلرنینگ شهرسازلیک و اوی-جای قوریلیشی وزیرلیگی اوشبو تاسیسات لایحه‌لری نینگ عملگه آشیریلیشی صناعت شهرچه‌سی ایچیده ضرور خدمتلرنی تیزیملی روشده کۉرسه‌تیش و باشقه‌ریش اوچون شرایط یره‌تیشینی ایتگن. «تمیم انصار» صناعت شهرچه‌سی نینگ باتفصیل لایحه‌سی اوّلراق تصدیقلنگن اېدی.
