بیرلشگن ملتلر تشکیلاتی نینگ آزیق-طعام و قیشلاق خۉجه‌لیگی تشکیلاتی (فائو) کوچه‌ییب باره‌یاتگن ال‌نینو حادثه‌سی همده ایجابي باسقیچگه تامان رواجلنه‌یاتگن هند اقیانوسی دیپال حادثه‌سی (IOD) افغانستانده یاغینگرچیلیک موسمیده یامغیرلر نینگ کۉپه‌ییشیگه سبب بۉلیشی ممکنلیگینی ایتدی.
اوشبو تشکیلات نینگ بوگون (یک‌شنبه، ۱۹-میزان) نشر قیلینگن حساباتیده ایتیلیشیچه، اکتوبر آییده افغانستان نینگ شرقي، شِمالی-شرقي، شمالي و مرکزي حدودلریده عادتده‌گیدن کۉپراق یاغینگرچیلیک بۉلیشی کوتیلماقده. یاغینگرچیلیکلر نینگ اساسي قِسمی آی نینگ ایکّینچی یرمیده یوز بېریشی ممکن.
فائوگه کۉره، بونده‌ی حالت قیشکی اېکینلرنی اېکیش و توپراق نملیگینی تأمینلشگه یاردم بېریشی ممکن. بیراق کوچلی و محلي یاغینگرچیلیکلر تۉستدن یوز بېره‌دیگن سوو تاشقینلریگه سبب بۉلیشی، یازگی اېکینلر نینگ قالگن قِسمینی همده باغ-راغلرده‌گی مېوه‌لرنی ییغیب آلیشگه خلل بېریشی ممکن.
شو بیلن بیرگه، فائونینگ تأکیدلشیچه، یازگی محصولاتلر بازاری اوچون ناقوله‌ی شرایطلر و قیشلاق خۉجه‌لیگی واسطه‌لری نرخلری‌نینگ یوقاریلیگی، یاغینگرچیلیک بۉییچه عمومي پراگنازلر قوله‌ی بۉلیشیگه قره‌مه‌ی، دهقانلرنینگ ۲۰۲۶/ ۲۰۲۷-ییلگی قیشلاق خۉجه‌لیگی موسمیده قیشکی اېکینلرگه سرمایه کیریتیش امکانیتینی چېکلشی ممکن.
تشکیلات نینگ قۉشیمچه قیلیشیچه، دهقانلرنینگ قیشکی بوغدای اېکیشگه بۉلگن مایللیگی عموماً آلگنده اۉزگرمه‌گن. بیراق کیمیاوي اۉغیتلر و اوروغلیک نرخلری‌نینگ یوقاریلیگی، شونینگدېک، یاغینگرچیلیک مقداری و سوغاریش سوویدن فایده‌لنیش امکانیتی اېکین اېکیله‌دیگن یېرلر نینگ یکوني میدانیگه تأثیر قیلیشی ممکن.
شو بیلن بیرگه، للمی بوغدای اوچون قوله‌ی یاغینگرچیلیکلر، حتا کیمیاوي اۉغیتلردن فایده‌لنیش چېکلنگن حدودلرده هم، اېکین میدانلرینی سقلب قالیش یاکه کېنگه‌یتیریش اوچون امکانیت یره‌تیشی ممکن.
جَنوبي تېبره‌نیش — ال‌نینیو (ENSO) بۉییچه سۉنگگی دیاگناستیک حساباتده ال‌نینو حادثه‌سی تۉلیق شکللنگنی و اونینگ کوچی ۲۰۲۶-ییل آخریگچه آشیشی کوتیله‌یاتگنی قید اېتیلگن. ۲۰۲۶–۲۰۲۷-ییللر کوز و قیش موسمیده جوده کوچلی ال‌نینو حادثه‌سی یوز بېریش احتمالی ۹۰ فایزدن یوقاری اېکنی ایتیلگن.
شونینگدېک، اکتوبر-دیکابر آیلریده اوشبو حادثه نینگ کوچی ۱۹۵۰-ییلدن بېری قید اېتیلگن اېنگ یوقاری درجه‌دن هم آشیب کېتیش احتمالی ۷۵ فایز دېب بهالنگن.
فائومعلوماتیگه کۉره، هند اقیانوسی دیپالی (IOD) حاضرده نېیترال حالتده، بیراق استه-سېکین ایجابي باسقیچ تامان کوچه‌ییب بارماقده. پراگناز مۉدللری ایاد نینگ ایجابي باسقیچی ۲۰۲۶-ییل آخرلریده شکللنیشی ممکنلیگینی کۉرسه‌تماقده. بیراق اونینگ کوچی و قنچه دوام اېتیشی حاضرچه نامعلوم.
اوشبو اقلیمي کۉرستکیچلرنینگ بیرگه‌لیکده‌گی تأثیری ۲۰۲۶–۲۰۲۷-ییللرده‌گی یاغینگرچیلیک موسمیده افغانستانده یامغیرلر کۉپه‌ییشی احتمالینی آشیریشی ممکن. بیراق شرایط مملکت‌نینگ تورلی حدودلریده هر خیل بۉلیشی ممکن.
