قیزلر خلق‌ارا کونی مناسبتی بیلن بیرلشگن ملتلر تشکیلاتی نینگ افغانستانده‌گی یاردم اداره‌سی (یوناما) افغانستانده‌گی میلیونلب قیزلر قشّاقلیک، اېرته تورموش قوریش، تعلیم آلیش امکانیتلری نینگ چېکلنگنی و سوادسیزلیک کبی تورلی معمالرگه دوچ کېله‌یاتگنینی ایتدی.
یوناما بوگون (یک‌شنبه، ۱۹-میزان) فیسبوک‌ده نشر قیلگن بیاناتیده تعلیم هنوزگچه قیزلر نینگ استعدادی و قابلیبلرینی رۉیابگه چیقریش نینگ اېنگ ثمره‌لی یۉلی اېکنینی تأکیدله‌دی.
بیرلشگن ملتلر تشکیلاتی‌نینگ افغانستانده‌گی یاردم اداره‌سی قیزلر خلق‌ارا کونی مناسبتی بیلن هر بیر افغانستانلیک قیز نینگ تعلیم آلیش، مناسب ایش قیلیش، شخصي تنلاولرینی عملگه آشیریش و اۉز آرزو-ایستکلری اساسیده کېله‌جگینی قوریش حقوقلرینی تأمینلش اوچون ینگی و عملي چاره‌لر کۉریشگه چقیردی.
یوناما: «هر بیر قیز اېرکین تعلیم آلیش، رواجلنیش و اۉزی ایسته‌گن کېله‌جکنی قوریش حقوقیگه اېگه»، دېیه قۉشیمچه قیلدی.
بو تشکیلات: «قیزلر کېله‌جک رهبرلریدیر و ایجادکارلردیر، قیزلر دنیانی اۉزگرتیره‌دیلر»، دېدی.
طالبلر بېش ییلدن آرتیق وقت دوامیده آلتینچی صنفدن یوقاری باسقیچلرده قیزلر نینگ تعلیم آلیشینی تعقیقلب کېلماقده.
بیرلشگن ملتلر تشکیلاتی معلوماتلریگه کۉره، اوشبو تعقیق قریب ۲۰۵ میلیون قیز نینگ تعلیمدن محروم بۉلیشیگه سبب بۉلگن.
طالبان، شونینگدېک، عیاللر نینگ اساسي حقوق و اېرکینلیکلریگه کېنگ کۉلملی چېکلاولر جاري اېتیب، اولرنینگ جمعیتده‌گی اشتراکی و فعالیتینی کېسکین چېکله‌گن.
