بیرلشگن ملتلر تشکیلاتی‌نینگ تعلیم، علم و مدنیت مسأله‌لری بۉییچه تشکیلاتی (یونسکو) غور ولایتیده‌گی تاریخي جام مناره‌سی طبيعي آفتلر خوفی و اونی محافظه قیلیش بیلن باغلیق معمالر سبب جدّي تهدیدلرگه دوچ کېله‌یاتگنینی، بو اېسه زودلیک بیلن اعتبار قره‌تیشنی طلب قیلیشینی معلوم قیلدی.
اوشبو تشکیلات بوگون (یک‌شنبه، ۱۹-میزان) فیسبوک صحیفه‌سیده «مدنیت نزاعلر و طبيعي آفتلر قربانیگه ایلنمسلیگی کېره‌ک»، دېب یازدی.
یونسکونینگ تأکیدلشیچه، هرورود دریاسی بۉییده قد راستله‌گن جام مناره‌سی افغانستان تاریخی و مدني میراثی‌نینگ نایاب گواهی حسابلنه‌دی همده جهان میراثی نینگ مهم اۉبژېکتلریدن بیریدیر.
یونسکو الفا جمغرمه‌سی نینگ مالیوي کۉمه‌گیده جام مناره‌سی نینگ حالتینی کوزه‌تیش، تاشقینلر خوفینی کمه‌یتیریش و محلي جماعه‌نی قۉللب-قوّتلش بۉییچه ایشلر آلیب باره‌یاتگنینی بیلدیرگن.
یونسکوگه کۉره، انشااتگه اۉرنه‌تیلگن مینیاتورنینگ قوریلمه‌لریدن آلینگن معلوماتلرنی منتظم تحلیل قیلیش متخصصلرگه اوشبو تاریخي یادگارلیک‌نینگ حالتینی یخشیراق توشونیش، اونی محافظه قیلیش و مناره‌‌نینگ اوزاق مدتلی برقرارلیگینی تأمینلش بۉییچه رېجه‌لر توزیشگه یاردم بېره‌دی.
یونسکونینگ قۉشیمچه قیلیشیچه، مناره یانیده کۉپریک قوریلگن. بو فوق العاده چاره‌لرنی عملگه آشیریش اوچون کیریشنی یخشیلش، شونینگدېک، محلي اهالی اوچون ینه‌ده خوفسیز و ایشانچلی قتناو امکانیتینی یره‌تیش مقصدیده عملگه آشیریلگن.
یونسکونینگ ایتیشیچه، ینه بیر مهم لایحه آغاخان جمغرمه‌سی تامانیدن الفا جمغرمه‌سی‌نینگ مالیوي کۉمه‌گیده عملگه آشیریلماقده. اونینگ مقصدی مناره کانستروکسیه‌سی نینگ برقرارلیگینی تأمینلش و اوشبو تاریخي یادگارلیکنی اوزاق مدت دوامیده محافظه قیلیشدن عبارت.
اوشبو تشکیلات جمع مناره‌سینی محافظه قیلیش بوتون انسانیتگه تېگیشلی بۉلگن میراثنی اسره‌ش دېگنی اېکنینی تأکیدله‌گن. بو یادگارلیک کېله‌جک اولادلر اوچون هم سه‌قلنیب قالیشی کېره‌ک.
جام مناره‌سی غور ولایتی‌نینگ شه
شهره‌ک تومنیده، جام دېب اتله‌دیگن واديده، جام و هرورود دریالری قۉشیله‌دیگن نقطه‌ده جایلشگن.
اوشبو مناره دنیاده‌گی اېنگ بلند خشتلی مناره‌لردن بیری حسابلنه‌دی.
مناره غووريلر سلاله‌سی‌نینگ حکمدارلریدن بیری سلطان غیاث‌الدین غوري دوریده ۶۵ متر بلندلیکده قوریلگن.
جام مناره‌سی ۲۰۰۲-ییلده یونسکو نینگ جهان مدني میراثی رۉیخطیگه کیریتیلگن. بیراق ایتیلیشیچه، سۉنگگی ییگیرمه ییل دوامیده اوشبو تاریخي انشااتگه یېترلیچه اعتبار قره‌تیلمه‌گن و اونینگ قوله‌ب توشیشی خوفی یوزه‌سیدن دایمي خواطرلر موجود.
