قندهار و ننگرهار ولایتلریده‌گی محلي منبعلر ایکّی کیشی‌نینگ «نامعلوم شخصلر» تامانیدن اۉلدیریلگنی حقیده خبر بېردی.
منبعلرگه کۉره، بوگون (یک‌شنبه، ۱۹ میزان) قندهار شهری‌نینگ ایکّینچی ناحیه‌سیده بیر اېرکک دستلب پیچاق بیلن هجومگه اوچره‌گن، سۉنگره اونینگ «باشی کېسیلگن».
منبعلر بو اېرکک «اتفاق» جامع مسجدی یقینیده اۉلدیریلگنینی اَیتماقده. بیراق اونینگ اۉلدیریلیش سببی حاضرچه نامعلوم.
طالبلرنینگ قندهار امنیه قوماندانلیگی هم بو اېرکک نینگ اۉلدیریلگنینی تصدیقلب، قاتللیکنی صادر اېتگن شخصلرنی انیقلش بۉییچه ایشلر دوام اېته‌یاتگنینی بیلدیرگن.
ننگرهار ولایتیده‌گی محلي منبعلر هم سرخ رود تومنیده «نامعلوم قوراللنگن شخصلر» تامانیدن اسماعیل اسملی بیر ییگیت اۉلدیریلگنی حقیده خبر بېردی.
منبعلرگه کۉره، بو ییگیت سرخ رود اولسواللیگی‌‌نینگ فتح‌اباد قیشلاغیده دۉستلریدن بیری‌نینگ اوییده مهمان بۉلگن. بیراق قوراللنگن شخصلر اونگه قره‌ته اۉق اوزیب، اونی اۉلدیرگن.
منبعلر قاتللیک سببی حاضرچه نامعلوم اېکنینی، قوراللنگن شخصلر قاتللیکدن سۉنگ واقعه جاییدن قاچیب کېتگنینی اَیتماقده.
منبعلر خبریگه کۉره، طالبلر بو ییگیتنی مهمان قیلگن خاندان اعضالرینی حبسگه آلگن.
ننگرهارده‌گی محلي طالبان مسووللری حاضرگچه بو باره‌ده ایضاح بېرمه‌گن.
