بیرلشگن ملتلر تشکیلاتی نینگ انسان پرورلیک یاردملرنی موافقلشتیریش اداره (اوچا) قیش یقینلشر اېکن، افغانستانگه قَیتیب کېله‌یاتگن مینگلب عایله‌لر باش‌پناه‌گه محتاج اېکنینی معلوم قیلدی.
اوچا بوگون (دوشنبه، ۲۰-میزان) ایکس اجتماعی ترماغیده نشر قیلگن بیاناتیده: «قیش یقینلشر اېکن، افغانستانگه قَیتیب کېله‌یاتگن مینگلب عایله‌لر یېترلی باش‌پناه، ایسّیقلیک، حمایه و ضرور یاردمگه جوده محتاج»، دېب یازدی.
اوچانینگ قۉشیمچه قیلیشیچه، قیش کوتیب تورمه‌یدی و گومانیتار یاردم هم کوتیب توریشی ممکن اېمس.
بیرلشگن ملتلر تشکیلاتی نینگ قاچقینلر بۉییچه عالي کمیسارلیگی معلوماتلریگه کۉره، جاري ییل نینگ دستلبکی تۉقّیز آییده ابران، پاکستان و باشقه مملکتلردن ۱ میلیون ۲۹۸ مینگ ۳۷۰نفر مهاجر افغانستانگه قَیتگن. شوندن ۷۱۶ مینگ ۴۰۰ نفری پاکستاندن، ۵۸۱ مینگ ۶۰۰ نفری اېسه ایراندن قَیتگن. قَیتگنلر نینگ ۵۶۳مینگ نفردن آرتیغی مجبوذن دېپورت قیلینگن.
بیرلشگن ملتلر تشکیلاتی اوّلراق ۲۰۲۶-ییلده افغانستانگه قَیتگنلرنی قۉللب-قوّتلش اوچون ۵۲۹.۲ میلیون دالر مبلغ ضرورلیگینی بیلدیرگن اېدی. اوشبو مبلغ آرقه‌لی قریب ۲.۷ میلیون کیشیگه یاردم کۉرسه‌تیش رېجه‌لشتیریلگن.
مذکور مبلغ چېگره‌لرده‌گی شاشیلینچ یاردم، قَیته جایلشتیریش، طبي خدمتلر، تعلیم، باش‌پناه و ایش ا‌ۉرینلری یره‌تیش کبی یۉنه‌لیشلرگه صرفلنیشی کۉزده توتیلگن.
شو بیلن بیرگه، بیرلشگن ملتلر تشکیلاتی جاري ییل اوچون افغانستانده‌گی عمومي گومانیتار یاردم دستورینی عملگه آشیریش مقصدیده ۱.۷۱ میلیارد دالر مبلغ سۉره‌گن اېدی. حاضرگچه بو مبلغ نینگ اتیگی ۳۱ فایزی، یعنی قریب ۵۳۰ میلیون دالری تأمینلنگن. دستور اوچون ضرور بۉلگن مبلغ نینگ قریب ۱.۸۱میلیارد دالری اېسه حلی هم یېتیشمه‌یپتی.
