طالبان سوزلاوچیسی ذبیح‌الله مجاهد پاکستاننی ایچکی معمالرینی حل قیلیش اوچون بو گروهنی عیبدار قیلمسلیککه، عکسینچه، اۉز خلقی نینگ فکری و حقوقلرینی حرمت قیلیشگه چقیردی.
مجاهد بوگون (دوشنبه، ۲۰-میزان) ایکس اجتماعي ترماغیده نشر قیلگن بیاناتیده پاکستان‌نینگ طالبانگه قرشی عیبلاولرینی «اساسسیز» دېب اته‌ب، بونی «موفقیتسیز سیاست» نمونه‌سی اېکنینی تأکیدله‌دی.
او شونده‌ی یازگن: «افغانستاننی اۉز موفقیتسیزلیکلری اوچون عیبدار قیلیش پاکستان رسميلری اوچون هېچ قنده‌ی معما نینگ یېچیمی اېمس. پاکستانده‌گی سیاسي، خوفسیزلیک، اجتماعي و اقتصادي معمالر تشویش اویغاتماقده و بوتون منطقه اوچون سلبي عاقبتلرگه آلیب کېلماقده.»
مجاهد قۉشیمچه قیلگن: «پاکستان رسميلری تامانیدن اساسسیز عیبلاولر نینگ ایلگری سوریلیشی، مذاکره جریانلریگه تۉسقینلیک قیلیش و یېچیملر اۉرنیگه بوتون اعتبارنی ترغیباتگه قره‌تیش موفقیتسیز سیاست نینگ نمونه‌سیدیر.»
طالبان سوزلاوچیسی شونده‌ی دېگن: «پاکستان ایچکی معمالرینی حل قیلیش اوچون کانتروکتیف قدملر تشلشی همده اۉز سیاستچیلری و خلقی نینگ فکری و حقوقلرینی حرمت قیلیشی کېره‌ک.»
بو بیانات پاکستان طالباننی قوراللی گروهلرنی قۉللب-قوّتلش و چېگره حدودلریده حرکتلرنی عملگه آشیریشده عیبله‌یاتگن بیر پیتده ینگره‌دی.
پاکستان تشقی ایشلر وزیرلیگی کېچه نشر قیلگن بیاناتیده افغانستان طالبانی پاکستان طالبانی (تی‌تی‌پی) و بلوجستان آزادلیک اوردوسی گروهلرینی قۉللب-قوّتله‌یاتگنینی بیلدیرگن. اسلام‌اباد اوشبو گروهلرنی «خوارج فتنه‌سی» و «هندستان فتنه‌سی» دېب اته‌یدی.
بیاناتده شونده‌ی دېییله‌دی: «پاکستان و افغانستان چېگره‌سینی بې‌قرارلشتیریش مقصدیده عملگه آشیریله‌یاتگن بونده‌ی حرکتلر تینچ قۉشنیچیلیک نینگ عمومي روحیگه همده ایکّی برادر دولت اۉرته‌سیده‌گی همکارلیککه اساسلنگن مناسبتلرگه ضددیر.»
پاکستان تشقی ایشلر وزیرلیگی افغانستان حدودیده «ترورچی عنصرلر نینگ دایمي موجودلیگی» و اولر نینگ بو مملکتده اېرکین فعالیت یوریته‌یاتگنی بیرلشگن ملتلر تشکیلاتی‌نینگ مانیتورینگ گروهی حساباتلریده یخشی حجتلشتیریلگنینی بیلدیردی.
