بیرلشگن ملتلر تشکیلاتی‌نینگ باله‌لر جمغرمه‌سی (یونیسف) جاري ییل‌نینگ اگوست آییده افغانستانده ۱.۳میلیون باله‌نی تۉییب طعاملنمسلیک حالتی بۉییچه تېکشیرگنینی معلوم قیلدی.
یونیسف یقینده نشر قیلگن گزارشیده اوشبو باله‌لردن ۱۱۱ مینگ ۹۹ نفری تۉییب طعاملنمسلیک سببلی دوالنیش اوچون یاتقیزیلگنینی بیلدیرگن.
یونیسف گزارشیده ایتیلیشیچه، اوشبو باله‌لر نینگ ۵۸ مینگ ۸۹۱ نفری آغیر درجه‌ده‌گی اۉتکیر تۉییب طعاملنمسلیکدن، ینه ۴۲ مینگ ۹۱۵ نفری اېسه اۉرته‌چه درجه‌ده‌گی اۉتکیر تۉییب طعاملنمسلیکدن اذیت چېکّن و یوقاری خوف گروهیده بۉلگن.
بیرلشگن ملتلر تشکیلاتی‌نینگ باله‌لر جمغرمه‌سی، شونینگدېک، افغانستانده ۳.۷ میلیون باله تۉییب طعاملنمسلیک خوفی آستیده اېکنینی بیلدیرگن. اولرنینگ قریب بیر میلیون نفری آغیر و حیات اوچون خوفلی درجه‌ده‌گی تۉییب طعاملنمسلیک خوفیگه دوچ کېلماقده.
یونیسف معلوماتیگه کۉره، ایکّی یاشگچه بۉلگن باله‌لر اۉتکیر تۉییب طعاملنمسلیک حالتلری نینگ قریب ۸۳ فایزینی تشکیل اېته‌دی. شو بیلن بیرگه، اۉتکیر تۉییب طعاملنمسلیک و ساغلیق بیلن باغلیق اسارتلر سببلی شفاخانه‌گه یاتقیزیلگن باله‌لر نینگ قریب ۴۰ فایزی آلتی آیگچه بۉلگن چقه‌لاقلردیر.
اوشبو تشکیلات آزیق-طعام خوفسیزلیگی نینگ یۉقلیگی همان بو حالت‌نینگ اساسي عامللریدن بیری اېکنینی ایتگن. پراگنازلرگه کۉره، جاري ییل‌نینگ اپرېلیدن سپتمبر آییگچه افغانستانده ۱۳.۸ میلیون کیشی بحران درجه‌سیده یاکه اوندن هم آغیر آزیق-طعام خوفسیزلیگی حالتیگه دوچ کېله‌دی.
یونیسف اگوست آییده ۱۸۹مینگ ۳۵۰نفر باله‌گه قراوچی شخصگه طعاملنیش بۉییچه مصلحت خدمتلرینی کۉرسه‌تگنینی معلوم قیلگن. شونینگدېک، ۱۲۱ مینگ ۷۱۴ نفر حامله‌دار عیالگه تورلی خیل میکرواېلیمنت قۉشیمچه‌لری تقدیم اېتیلگن.
یونیسف، شونینگدېک، ۸۰ کیشی طبیات خادیمینی تۉییب طعاملنمسلیک نینگ آلدینی آلیش و اونی دوالش، ینه ۱۰۳ نفر خادمنی اېسه آنه، گودک و کیچیک یاشده‌گی باله‌لر طعاملنیشی بۉییچه اۉقیتگنینی بیلدیرگن.
یونیسف اگوست آییده افغانستان بۉیلب ۶.۶میلیون کیشیگه طبي خدمت کۉرسه‌تگنینی، شونینگدېک، سوو تاشقینلری، چېگره‌ده‌گی کېسکینلیکلر، اهالی نینگ کۉچیشی و زلزله‌لردن ضرر کۉرگن حدودلرده یاردم کۉلمینی کېنگه‌یتیرگنینی ایتگن.
بیرلشگن ملتلر تشکیلاتی‌نینگ باله‌لر جمغرمه‌سی، شو بیلن بیرگه، انسانپرورلیک خدمتلری اوچون اجره‌تیله‌یاتگن مبلغلرنینگ کمه‌یگنیگه اعتبار قره‌تیب، اگوست آییگه قدَر افغانستانده ۲۰۲۷-ییل اوچون انسانپرورلیک یاردمی بۉییچه ضرور مبلغلر نینگ اتیگی ۲۹.۷ فایزی مالیه‌لشتیریلگنینی بیلدیرگن.
تشکیلات نینگ تأکیدلشیچه، مبلغ یېتیشمسلیگی خدمت کۉرسه‌تیش مرکزلری نینگ یاپیلیشیگه، یاردملر نینگ توخته‌تیلیشیگه، جغرافیه قمراو نینگ قیسقریشیگه و تأمینات جریانلری نینگ ایزدن چیقیشیگه سبب بۉلگن.
انسانپرورلیک تشکیلاتلری جاري ییلده بیر نېچه بار مبلغ یېتیشمسلیگیدن شکایت قیلیب، بو حالت احتیاجمند اهالیگه ضرور خدمتلرنی کۉرسه‌تیش امکانیتلرینی چېکله‌گنینی بیلدیرگن.
اولر افغانستانده‌گی انسانپرورلیک بحرانی نینگ ینه‌ده کوچه‌ییشیگه یۉل قۉیمسلیک اوچون زودلیک بیلن مالیوي یاردم کۉرسه‌تیشگه چقیرگن.
