افغانستانلیک رسّام ربابه محمدی کاناداده «مکس گالا» تشکیلاتی تامانیدن «۲۰۲۶-ییل نینگ اېنگ یخشی رسّامی» دېب اعتراف اېتیلدی.
«مکس گالا» تشکیلاتی ییل رسّامی مکافاتینی شنبه کونی (۱۸-میزان) تتورانتو شهریده اۉنلب صنعتکارلر اشتراکیده اۉتکزیلگن مراسمده ربابه‌گه تاپشیردی.
اوشبو تشکیلات اۉزی‌نینگ انستاگرام صحیفه‌سیده: «بیز افغانستانلیک رسّام و تدبیرکار ربابه‌نی تقدیرله‌یاتگنیمیزدن فخرلنه‌میز. اوشبو مناسب اعتراف اونینگ استعدادی و ایجادکارلیگی‌نینگ تن آلینگنیدن دلالت بېره‌دی»، دېب یازگن.
ربابه محمدی هم اوشبو مکافاتنی قۉلگه کیریتگنیدن خورسندلیگینی بیلدیرر اېکن، شونده‌ی دېگن: «بدیعي یوتوقلریم قطاریگه ینه بیر یوتوق قۉشیلدی. کاناداده‌گی مکس گالا تشکیلاتی نینگ ۲۰۲۷-ییل رسّامی مکافاتی مېنگه نصیب اېتدی.»
او انستاگرامده‌گی پیامیده اوشبو هیکلچه اونینگ اوچون شونچه‌که مکافات اېمسلیگینی، بلکه قیینچیلیکلرگه قره‌مه‌ی آرزولریگه ایشانگن و حرکتدن توخته‌مه‌گن برچه کونلرینی اېسله‌تیب توریشینی یازگن.
ربابه اوشبو تنلاوده نامزاد بۉلگن ۲۰۰ رسّام آره‌سیدن عامه‌وي آواز بېریش و حکملر بهالشی اساسیده اېنگ یخشی ۱۰ کیشی رسّام قطاریدن جای آلگن. شوندن سۉنگ او اوچ نفر فینالچی آره‌سیدن ییل رسّامی اېتیب تنلنگن.
«مه‌کس گله» تشکیلاتی ۲۰۲۵-ییلده کاناداده تشکیل اېتیلگن بۉلیب، هر ییلی ۱۰ ته تورلی یۉنه‌لیشده فعالیت یوریته‌یاتگن انسانلر و الهاملنتیرووچی شخصلرگه مکافات بېره‌دی. جمله‌دن، هر ییلی کانادانینگ بیر نفر ییل رسّامی و بیر نفر ییل عیالینی اعلان قیله‌دی.
بو ییل ییل رسّامی مکافاتینی قۉلگه کیریتگن ربابه محمدی کاناداگه تخمیناً ایکّی یریم ییل اوّل کېلگن. او ایکّله قۉلی و ایکّله آیاغیدن معلول بۉلگنی همده آغزی بیلن رسم چیزگنی سببلی، بوندن اوّل هم اۉز صنعتی، سعی-حرکتی، و باشقه‌لرگه الهام بېرووچی فعالیتی اوچون کۉپلب مکافاتلرگه سزاوار بۉلگن
