جهان ساغلیقنی سقلش تشکیلاتی افغانستان‌نینگ ننگرهار ولایتیده پولیو یاکه باله‌لر فلجی کسللیگی‌نینگ بیر ایجابي حالتی قید اېتیلگنینی معلوم قیلدی. تشکیلات‌نینگ بیلدیریشیچه، جاري ییلده افغانستانده قید اېتیلگن پولیونینگ عمومي حالتلری سانی ۳۶ تگه یېتگن.
جهان ساغلیقنی سقلش تشکیلاتی حساباتیگه کۉره، ینگی حالت ننگرهار ولایتی نینگ سرخرود تومنیده قید اېتیلگن.
تشکیلات، شونینگدېک، شو هفته هلمند ولایتی‌نینگ نهرسراج اولسواللیگی‌‌ده پولیو بۉییچه محیطدن آلینگن نمونه‌لردن بیریده هم ایجابي حالت انیقلنگنینی بیلدیرگن. شو بیلن جاري ییلده افغانستانده محیطدن انیقلنگن پولیو حالتلری سانی ۹۲ تگه یېتگن.
افغانستان حاضرده دنیاده پولیو بیلن کسللنیش حالتلری اېنگ کۉپ قید اېتیله‌یاتگن مملکت حسابلنه‌دی. بو مملکتده جاري ییلده پولیو حالتلری آشگن. ۲۰۲۵-ییلده افغانستانده ۲۱ ته ایجابي حالت قید اېتیلگن اېدی.
حاضرده افغانستان‌دن کېین پولیو بیلن کسللنیش حالتلری اېنگ کۉپ قید اېتیله‌یاتگن مملکت پاکستان حسابلنه‌دی.
جهان ساغلیقنی سقلش تشکیلاتی گزارشیگه کۉره، بو هفته پاکستانده هم خیبر-پختونخوا ایالتی‌نینگ خیبر تومنیدن ینگی بیر حالت قید اېتیلگن. جاري ییلده پاکستانده جمع‌ی ۶ ته پولیو حالتی قید اېتیلگن. اۉتگن ییلی اېسه پاکستانده ۳۱ ته حالت انیقلنگن اېدی.
افغانستان و پاکستان حاضرده دنیاده پولیو کسللیگی بوتونله‌ی یۉق قیلینمه‌گن یگانه مملکتلردیر. بو مملکتلرده خوفسیزلیک معمالری و واکسین آلیش‌نینگ آلدینی آلیش پولیوگه قرشی کوره‌شده‌گی اساسي تۉسیقلردن بیری حسابلنه‌دی.
سۉنگگی ییللرده پاکستاندن افغانستانلیکلرنینگ عامه‌وي روشده دېپورت قیلینیشی سببلی ایکّی مملکت چېگره‌سیده‌گی اهالی‌نینگ کېنگ کۉلمده کۉچیشی پولیو نینگ ترقه‌لیشی باره‌سیده‌گی خواطرلرنی کوچه‌یتیردی.
